DILI, 20 jullu 2023 (TATOLI)–Sekretáriu Estadu Asuntu Toponomia no Organizasaun Urbana, Germano Santa Brites, hateten, Autoridade Munisípiu Dili (AMD) sei uza nia kbiit no forsa hodi fó sansaun ba karreta no ema-ne’ebé mak soe foer arbiru.
“Ami sei fó sansaun ba karreta ne’ebé soe foer arbiru hanesan iha Cristo Rei, Dolok Oan no fatin seluk. Maibé, bainhira ami hetan no simu informasaun hosi komunidade mak dehan karreta ida-ne’e fakar arbiru mak ami sei koordena ho polisia hodi buka tuir nia para hetan sansaun, nune’e nia bele kumpre dehan katak raut hosi fatin ne’e ba halo foer fatin seluk, la di’ak,” Germano Santa Brites hateten ba jornalista sira, hafoin hala’o vizita ba semitériu Santa Cruz ho Becuse, Dili, kinta ne’e.
Kona-ba loja supermerkadu sira nia soe foer fatin, nia dehan, autoridade munisípiu Dili iha orientasaun rua ne’ebé mak fó ba loja sira liuhosi autoridade komunitáriu sira katak lixu ne’ebé ho kuantidade boot sira ba soe diretamente iha lixeiru Tibar, maibé ba lixu sira-ne’ebé ho volume kiik-oan sira bele so’e iha lixu fatin ne’ebé Governu prepara.
Tanba, AMD hasai ona sirkulár ida kona-ba oras atu komunidade iha kapitál Dili soe fo’er mak iha dadeersan soe iha 06h00 no iha lokraik bele soe foer iha tuku 07h00 no liuhosi oras ida-ne’e labele soe lixu.
Iha Dekretu-Lei Númeru 33/2008 ne’e atu implementa ba sidadaun hotu-hotu iha Dili laran kuandu soe fo’er arbiru no la tuir regra mak autoridade munisípiu Dili sei fó koima ba infratór sira, liuhosi halo kooperasaun ho instituisaun relevante sira hanesan Polísia Nasionál Timor Leste, Sekretáriu Estadu Meu Ambiente, Ministériu Obra Públika no husu mós orientasaun hosi Ministériu Administrasaun Estatál.
Nia hateten, Governu fó sai ona avizu ba abitante ka negosiante sira-ne’ebé faan sasán trotoar leten no bero aat sira-ne’ebé soe hela iha atsi-ninin sira-ne’e, bainhira liu fulan oin mak la kumpre entaun Governu sei foti sasán hirak ne’e soe ba lixeira Tibar.
“AMD latolera negosiante faan iha dalan públiku tanba kria engarafamentu. Ida-ne’e ita avizu ona ba sidadaun hotu-hotu iha kapitál Dili nian hahú hosi Tasi-Tolu to’o Metinaro no hosi tasi ibun sira. Ami avizu to’o de’it iha agostu depois liu fulan ne’e mak AMD uza nia kbiit sei foti sasán sira-ne’ebé faan iha dalan boot no iha tasi ibun, hanesan bero aat sira ne’e sei lori ba soe iha lixeira Tibar,” nia dehan.
Faan karreta-motorizada tenke iha fatin própriu
Enteratntu, Governante ne’e husu ba abitante sira-ne’ebé faan karreta no motorizada iha dalan públiku sira tenke faan iha fatin públiku no tenke iha armajen rasik.
“Estadu hanoin hela hodi buka prepara fatin maibé maluk ne’ebé mak faan karreta dahuluk kompañia faan karreta ho motór tenke iha fatin mesak no tenke iha armajen. Bainhira karreta mai hatama tiha lai mak lori sai ba faan. Ba sira-ne’ebé mak sei faan iha dalan públiku no trotoar sira ne’e, husu nain tenke komprende fatin faan nian. Maibé kaundu avizu demais mak la kumpre munisípiu Dili iha fatin di’ak ruma bele ajuda sira,” nia dehan.
Jornalista : Osória Marques
Editór : Cancio Ximenes
