DILI, 31 jullu 2023 (TATOLI)—Ministru Prezidénsia Konsellu Ministru, Agio Pereira, hala’o sorumutuk ho Enkarregadu Negósiu Embaixada Estadu Unidu Amérika (EUA) iha Timor-Leste, Tom Daley.
Diplomata ne’e felisita Ministru ba ninia kargu foun daudaun ne’e hanesan Ministru Prezidénsia Konsellu Ministru no hatudu vontade Estadu Unidu Amérika nian hodi apoia Governu atu konkretiza ninia prioridade sira, no sei hametin liután relasaun bilaterál durante mandatu IX Governu Konstitusionál.
“Durante reuniaun ne’e, diskute ona projetu kooperasaun balun entre Estadu Unidu Amérika no Timor-Leste. Entre projetu sira ne’e, ko’alia liu projetu reabilitasaun Aeródromu Baucau, nune’e mós parseria ho ajénsia norte-amerikana Millennium Challenge Coorporation (MCC), ne’ebé abranje área importante sira hanesan edukasaun, saneamentu, abastesimentu bee no drenajen,” Ministru Prezidénsia Konsellu Ministru, Agio Pereira, haktuir liuhosi nota ne’ebé Agência Tatoli asesu, segunda ne’e.
Notísia relevante : F-FDTL-Forsa Armada EUA fortifika kooperasaun liuhosi ezersísiu CARAT
Ministru Agio Pereira aprezenta ba diplomata amerikanu ne’e, kona-ba prioridade ba loron dahuluk 120 mandatu nian ne’ebé aprezenta hosi Primeiru-Ministru bainhira Ezekutivu ne’e simu pose no liña jerál programa Governu nian no salienta apoiu unanimidade hosi Parlamentu Nasionál.
Entre prioridade Ezekutivu nian ne’ebé estabelese ona, foka liu ba dezenvolvimentu ekonómiku, hasa’e setór petrolíferu, investimentu ba infraestrutura, formasaun rekusu umanu, desentralizasaun administrativa, kriasaun empregu no adezaun Timor-Leste ba Asosiasaun Sudeste Aziátiku (ASEAN, sigla inglés).
Governante ho diplomata ne’e ko’alia mós kona-ba akordu ne’ebé permite Governu EUA mantein direitu utiliza rai ba ninia Embaixada iha Dili no hanesan troka ba ida-ne’e, fasilita Governu Timor-Leste hodi halo instalasaun foun ba ninia Embaixada iha Washington, nune’e mós ba ninia misaun hamutuk ho Organizasaun Nasaun Unida iha Nova Iorke.
Jornalista : Antónia Gusmão
Editora : Julia Chatarina
