MALIANA, 31 jullu 2023 (TATOLI)- Hafoin eleitu foin lalais ne’e liu hosi kongresu munisipál, Prezidente Konfederasain Desportu Timor-Leste (CDTL, sigla portuges), Mário Soares, ho nia estrutura inklui Prezidente Asosiasaun Desportu sira, segunda ne’e halo sorumutu ho Prezidente Autoridade Munisipál (PAM) Bobonaro, Ernesto de Oliveira Barreto.
Iha Enkontru oras ida resin ne’e Prezidente Mário Soares, halo aprezentasaun estrutura CDTL, no husu apoia finanseira inklui identifika fatin propriu atu harii sede.
Notisia relevante: Maximiano Neno eleitu Prezidente CDTL Oé-Cusse
“Ha’u bele dehan katak munisipiu mak sai odamatan boot ba CDTL, munisípiu mak lori CDTL nia lian, proposta ba hato’o iha nasionál liuhosi diresaun idak-idak nian, tanba ne’e buat foun ida maske tuan ona iha Timor-Leste, maibé izeste iha munisípiu Bobonaro foin primeira vez, uluk iha tiha ona, maibé nia estrutura la kompletu, agora kompleta kedas ho nia estrutura hamutuk ami na’in neen,” nia informa ba jornalista sira, iha salaun enkontru administrasaun munisípál Bobonaro.
Nia subliña estabelesimentu CDTL atu sai mahon ba asosiasaun 12 ne’ebé eziste iha munisípiu Bobonaro.
“Ha’u atu esplika katak, iha atleta mak foin iha asosiasaun, no Asosiasaun iha mak foin iha CDTL, agora ida ne’e ba oin presiza iha orsamentu tanba ita ko’alia konaba prátika,” Prezidente CDTL hakle’an.
Prezidente Asosiasaun Futeból Bobonaro, Domingos Gouveia Moniz ‘Tanenti’, sujere ba Prezidente Autoridade Munisípiu Bobonaro atu tau orsamentu ba CDTL iha OGE 2024.
“Ita haree CDTL ne’e forte mak asosiasaun hotu foin forte, tanba nia mak sai aman ba asosiasaun hotu-hotu, entaun presiza orsamentu, tanba ita atu hakat ba poder lokál desportu mós salah satu tama iha kriteria ida,” Prezidente AFB dehan.
Prezidente Autoridade Munisipál Bobonaro, Ernesto de Oliveira Barreto, konsidera estabelesimentu CDTL iha munisípiu ne’e importante tebes, tanba ne’e sei buka meiu ba preokupasaun ne’ebé hato’o.
“Ha’u nia hanoin kona-ba fatin ita-boot sira halo pedidu mai iha ne’e, ita bele haree fatin, konbá orsamentu ho ida apoia pesoál administrasaun ne’e ita-boot sira halo proposta mai, ami enkaminha ba nasionál liuliu Ministériu Juventude no Desportu,” nia katak.
Notísia Relevante:CDTL monitoriza ona ba federasaun desportiva 13
Jornalista: Sergio da Cruz
Editór: Evaristo Soares Martins
