DILI, 02 agostu 2023 (TATOLI)–Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, hateten komemorasaun loron istóriku Forcas Armadas da Libertação de Timor-Leste (FALINTIL) ba dala-48 (20 agostu 1975-20 agostu 2023) ne’ebé selebra iha kada 20 agostu ne’e, veteranu sira presiza halo reflesaun.
Notísia Relevante: Komemora loron FALINTIL, José Ramos horta enkoraja FALINTIL FDTL profisionál liután
“Tanba ne’e, loron ida-ne’e, loron istóriku loron espesiál ba timoroan hotu liuliu ba intelektuál sira, hotu-hotu tenke halo reflesaun espesialmente ba veteranu sira atu komunga hanoin sira-ne’e, nune’e husik hela ba jerasaun foun sira,” Gil da Costa Monteiro “Oan Soru” hateten ba Agência Tatoli, hafoin halo sorumutu ho BRI iha edifísiu MAKLN, Caicoli, tersa ne’e.
Tanba, nia hateten, liuhosi Falintil mak ohin loron Timor-Leste bele korare-an hosi milísia hodi hetan patria ba libertasaun nasionál.
“Laiha Falintil mak ita sei la ukun-aan. Tanba ne’e, tuir ha’u-nia hanoin loron Falintil ne’e loron importante ba sidadaun hotu-hotu iha Timor-Leste,” nia dehan.
Liga ho loron Falintil ho kontestu iha momentu ne’ebá ne’e, partidu polítika lima eziste iha tinan 1975, úniku Fretilin mak ko’alia kona-ba ukun rasik-aan.
“Ida-ne’e, ita ko’alia onestu de’it. Ha’u ema CNRT maibé istória ne’e istória, ita labele minimiza fali, ne’e ita sala. Agora se iha tempu ne’ebá polítika sira mak laiha timoroan sira-ne’ebé ho forsa hamriik iha polítika nia sorin, polítika ne’e bele la’o? Tanba ne’e, loron ida-ne’e la’ós loron Falintil de’it maibé loron ezisténsia Falintil nian. Iha ne’ebé hakerek klaru katak Forcas Armadas da Libertação de Timor-Leste (FALINTIL). ida-ne’e bele dehan konseitu polítika aluta kontinua,” nia hateten.
Iha loron importante ne’e presiza atu dignifika no valoriza, nia dehan, la’ós katak veteranu hotu-hotu tenke rekoñese no veteranu hotu-hotu la rekoñese, ne’e la’e. prosesu hotu la’o fazeadamente.
“Hosi ne’e mak ita atu dehan bainihra no oinsá loos mak Estadu no Governu bele valoriza nia sidadaun timoroan iha aspetu hotu-hotu. Ita hotu hamutuk mak hodi deside no valoriza veteran siea. La’ós ministru de’it mak tuur deside valoriza ne’e, labele,” nia dehan.
Loron 20 agostu maka mosu naran FALINTIL, bainhira Comite Central da FRETILIN (CCF) hosi Aileu to’o Dili, hanesan saudozu Nicilau Lobato, Mari Alkatiri no selu seluk mak muda fali naran ida Forças Armadas da Defesa do Povo Maubere ne’ebé funda uluk kedas ona ba fali FALINTIL.
Iha momentu ne’eba, iha 20 agostu lorokraik, mak Koomandante Jerál, Rogerio Lobato, fo hatene katak naran FORÇAS ARMADAS DA DEFESA DO POVO MAUBERE muda fali ba naran Forças Armadas da Libertção Nacional de Timor-Leste (FALINTIL).
Komandante Rogerio Lobato hateten, saudozuo Presidente Nicolau Lobato no Mari Alkatiri mak fó naran FALINTIL ne’e, no Rogerio Lobato mos aseita naran ida-ne’e kapaas tanba naran ne’e korresponde duni ba situasaun aktuál ida ne’eba.
Notísia Relevante: Presiza Valoriza Loron FALINTIL Hanesan Loron Nasionál
Jornalista : Osória Marques
Editór : Cancio Ximenes
