DILI, 08 agostu 2023 (TATOLI)–Ministru Asuntu Kombatente Libertasun Nasionál (MAKLN), Gil da Costa Monteiro “Oan Soru”, hateten iha mandatu tinan lima ne’e MAKLN hamutuk nia Sekretária Estadu Asuntu Kombatente Libertasaun Nasionál (SEAKLN) hodi buka-tuir veteranu falsu halo falsifikasaun dadus no hapara pensaun, hodi entrega ba Ministériu Públiku (MP) no prosesa tuir regra ne’ebé iha.
Notísia Relevante: Lista veteranu falsu na’in-500-resin ba ona Ministériu Públiku
“Ami buka veteranu falsifika dokumentu ne’e hanesan buka hafuhu busa, ami la’o hela, ami hetan ona balun, ami hapara dadauk ona osan (pensaun). Hanesan uluk, ha’u sei sekretáriu Estadu ha’u ko’alia kona-ba ida-ne’e barak loos hodi hapara lubuk ida ona. Maibé, ha’u ho ha’u-nia sekretária Estadu nafatin buka tuir,” Oan Soru hateten ba Agência Tatoli iha nia kna’ar fatin, segunda ne’e.
Hosi ema 500-resin ne’ebé falsifika dokumentu ne’e balun ba ona Ministériu Públiku (MP), tanba MAKLN mós iha gabinete auditoria ne’ebé halo servisu hodi identifka ema-ne’ebé mak falsifika no husu sasin tenke iha evidénsia ba nia partisipasaun iha ai-laran.
“Iha ne’ebá atu loke prosesu investigasaun ne’e sira-nia kompeténsia ona la’ós ami-nian problema ona. Ami-nian mak submete ba MP de’it, nune’e ami buka nafatin ema-ne’ebé falsifika dokumentu,” nia hateten.
Antes ne’e, iha tinan 2022, Polísia Siéntifiku Investigasaun Kriminál (PCIC, sigla Portugés) halo kooperasaun ho Ministériu Asuntu Kombatente no Libertasaun Nasionál (MAKLN) sesante Júlio Sarmento da Costa ‘ Meta Malik’, hahú loke prosesu investigasaun ba kazu falsifikasaun dokumentu hamutuk 32, hodi submete ba PCIC atu halo prosesu inkéritu tanba deskonfia mosu indísiu krime.
Notísia Relevante: MP halo hela investigasaun ba dokumentu veteranu “falsu” 500-resin
Jornalista : Osória Marques
Editór : Cancio Ximenes
