DILI, 11 agostu 2023 (TATOLI) – Tinan-tinan, mundu tomak selebra loron Mundiál Juventude nian ne’ebé monu iha 12 agostu, ho nune’e tinan ida ne’e Tema Global ba selebrasaun loron ne’e mak “Green Skills for Youth: Towards a Sustainable World” ka joven sira-nia abilidade verde iha Dezenvolvimentu Sustentável ba Mundu.
Tinan ida ne’e, mundu tomak hakarak atu hasa’e konsiénsia no promove sensibilizasaun kona-ba prátika sustentável entre joven sira no partisipasaun iha atividade sira ne’ebé relasiona ho sustentabilidade ambientál no dezenvolvimentu komunitáriu.
Komemorasaun ne’e konvida foinsa’e sira servisu hamutuk insentiva inovasaun no mudansa sosiál no haburas kultura dame.
Komunidade internasionál selebra loron munidál juventude ne’e tinan-tinan, atu foka atensaun mundu nian ba asuntu juventude no mós selebra jovens sira-nia poténsia nu’udar autór no parseiru importante ida iha sosiedade globál ohin loron, ida ne’e hatudu mundu nia apresiasaun ba juventude sira-nia kapasidade atu hala’o asaun sira ne’ebé di’ak ba mundu.
Iha Timor-Leste, Ministru Juventude Desportu, Arte no Kultura MJDAK) , Iha programa Governu dasia spesifikamente temi ona iha Polítika Nasionál Juventude ne’ebé materializa iha Planu Asaun Nasionál Juventude ba tinan lima nian no Programa Governu Dasia nian ba area juventude, Desportu, arte no kultura ne’ebé agora daudaun hatur iha Planu estratejia tinan lima tuir mandatu Governu nian.
“Internasionalmente hare’e katak totál númeru populasaun pursentu bo’ot mai hosi númeru juventude no haree mós katak problema ne’ebé joven sira hasoru kompleksu tebes tanba ne’e hetan duni atensaun hosi parte hotuhotu, komemora mós loron internasional munidál juventude iha Timor-Leste hanesan jestu ida hodi hatudu katak Timor-Leste mós tau atensaun ba dezenvolvimentu juventude”, Diretór Jeral MJDAK David Tomas dehan liuhosi komunukadu ne’ebé Agência TATOLI asesu, ohin.
Timor-Leste hanesan nasaun joven iha rejiaun ho pursentu populasaun joven ne’ebé ás liu, mós hatudu nia kompromisu hodi selebra loron munidál ne’e liuhosi envolve joven sira iha asaun lokál, nasionál no internasional ne’ebé iha impaktu pozitivu ba komunidade internasional tomak.
Tanba ne’e, selebrasaun loron mundiál juventude tinan ida ne’e sei hala’o liuhosi atividade lubuk ida iha munisípiu Covalima hahú hosi 08 agostu 2023 iha sentru Juventude Covalima (SJC) no iha kapitál Dili sei realiza iha MJDAC Lecidere Dili iha 10 agostu.
“Koñesimentu, abilidade, valor no atitude nesessáriu atu moris, dezenvolve no apoiu sosiedade ida ne’ebé sustentável no efisiente hosi rekursu”, tenik iha komunikadu ne’e.
Komemorasaun tinan ne’e, Objetivu prinsipál mak atu hasaé konsiénsia no promove sensibilizasaun kona-ba prátika sustentável entre joven sira, no partisipasaun iha atividade sira ne’ebé relasiona ho sustentabilidade ambientál no dezenvolvimentu komunitáriu.
Tuir dadus globál hatudu, mundu ohin loron inklui Timor-Leste, ho mudansa klimátika ne’ebé iha, lori dezastre bo’ot iha ambiente. Ambiente ne’ebé la verde ona ho lia fuan seluk ambiente ne’ebé la saudavél ona.
Ho nune’e ne’e, Tema ida ne’e importante no pertinente tebes mós ba Timor-Leste, atu bele tau iha konsiderasaun no buka solusaun ba situasaun atual mak Timor-Leste hasoru no-mós mundu global hasoru.
Selebra loron munidál ne’e iha Dili atividade doasaun ran, jogu amizade, atividade sira ne’e hala’o atu promove desportu sai hanesan kultura ida iha sosiedade, haforti desportu iha baze atu ajuda kontribui ba Timor-Leste nia prestasaun desportivu iha nivel nasionál, rejionál no internasional.
Aleinde ne’e, sei realiza Kompetisaun Diskursu Públiku Nível Eskola Sekundáriu sira iha Dili laran atu promove abilidade diskursu joven sira nian nudar futuru lideransa iha joven sira-nia leet.
MJDAK agradese joven sira hosi Centru Juventude Covalima, Centru Juventude Comoro, Consellu Nasional Juventude Timor Leste (CNJTL), Asosiasaun Parlamentu Foin-Sa’e Timor-Leste (APFTL), Asosiasaun Defisiente Timor Leste (ADTL), Cruz Vermella Timor Leste (CVTL), Juventude Hadomi Natureza (JHN), Aliansa Nasional Controlu Tabaku (ANCT), Uniaun Nasional Eskuteru Timor Leste (UNETL) ne’ebé mak hamutuk ho MJDAK organiza selebrasaun ne’e.
MJDAC nia dezeja selebrasau di’ak ida no susesu ba joven sira hotu iha Timor-Leste laran tomak.
Jornalista: Hortencio Sanchez
Editór : Zezito Silva
