DILI, 29 agostu 2023 (TATOLI)—Bee Timor-Leste, Empreza Públika (BTL, E.P) husu ba populasaun atu halo jestaun di’ak ba bee tanba daudaun tama ona klima bailoro ne’ebé halo rekursu bee iha rai okos sira hahú menus.
“Ha’u bele hateten katak, iha área barak menus bee tanba klima hahú tama ona ba bailoro, entaun automátikamente rekursu bee ne’ebé mai hosi bee-matan sira hahú menus no iha rai okos menus ona, iha parte balun ne’ebé bee menus ona ne’e tanba rekursu bee menus,” Diretór Manutensaun no Operasaun BTL, E.P, Aleixo dos Santos, hateten iha ninia knaar fatin, Caicoli, segunda ne’e.
Notísia relevante : Empreza GT internasionál Taiwan apoia BTL, E.P halo jestaun rekursu bee-moos
Nia dehan, tanba rekursu bee menus, maka hotu-hotu presiza asegura, ezemplu iha metru kontadór ona karik bainhira enxe ba fatin sira nakonu ona, tenke taka para ema seluk bele asesu fali.
“Karik bee iha tenke enxe ba rezervatóriu nune’e rezerva bee ba tempu naruk, labele depende de’it ba torneira no sanyo. Tanba ne’e mak husu nafatin komunidade katak ita komesa tama ba bailoro, ita tenke jere bee ho di’ak atu nune’e hotu-hotu bele asesu bee ho di’ak,” nia akresenta.
BTL, E.P hakarak atu halo melloramentu sistema sira tanba daudaun sistema ezistente mai hosi tempu Indonézia, nu’ne’e to’o tempu ukun-an kanu sira barak iha rai-okos no presiza troka tanba populasaun loron ba loron aumenta no demanda ba konsumu bee a’as.
Aleinde ne’e, empreza estatál ne’e distribui ona metru kontadór bee hamutuk 220 iha munisípiu hotu, ne’ebé kada munisípiu iha kontadór 11 no Dili 1.760.
“Metru kontadór sira ne’e balun hahú monta ona tantu iha munisípiu no Dili, hahú ona desde jullu 2023, no tuir planu sei ramata iha outubru tinan ne’e. Monta kontadór la’ós obrigatóriu, maibé BTL nia hakarak populasauntenke ba rejistu. Bazeia ba ida-ne’e mak tékniku BTL, E.P ba monta maibé tuir planu kada zona presiza monta metru kontadór 40 kada fulan,” nia salienta.
Intensaun monta metru kontadór atu fasilita populasaun sira halo jestaun di’ak ba bee, maski kliente tenke selu kada fulan.
Jornalista : Antónia Gusmão
Editora : Julia Chatarina
