DILI, 08 setembru 2023 (TATOLI)- Ministériu Administrasaun Estatál (MAE) liuhusi Sekretariadu Tékniku Administrasaun Eleitorál (STAE), hahú preparadu atu fasilita ba eleisaun líder komunitáriu sira iha territóriu nasionál.
Governu mós halo ona aprovasaun, kona-ba data realizasaun asembleia aldeia no konsellu suku iha ámbitu prosedimentu ba eleisaun líder komunitáriu sira.
“Preparasaun ba eleisaun Konsellu Suku nian, dahuluk mak kalendáriu eleisaun nian tanba ne’e ekipa STAE nia ne’ebé fasilita eleisaun ne’e hahú hala’o prosesu formasaun nian, hafoin ne’e ekipa sira sei bá munisípiu to’o kada suku hodi organiza eleisaun ne’e”, Ministru Tomás do Rosário Cabral, ba jornalista sira iha City8, Dili, sesta ne’e.
Governante ne’e hateten STAE mós preparadu ona atu fasilita ekipa formadu, transporte no ekipamentu votasaun inklui halo rekrutamentu ba traballadór adisionál hodi suporta rejistu votante sira.
“Husu sidadaun ka ema ne’ebé konfuzaun kona-ba prosesu eleisaun xefe suku bele kontaktu diretamente ba STAE liuliu ekipa sira ne’ebé koloka ona ba munisípiu,” nia hateten.
Iha biban hanesan, Diretór Ezekutivu STAE, Acilino Manuel Branco, hateten katak STAE sempre prontu atu fasilita eleisaun oioin liuliu eleisaun ba konsellu suku ne’e.
“Hafoin regulamentu Governu nian determina tiha ona data eleisaun Konsellu Suku nian, STAE halo kedas inisiativa atu apoia implementasaun eleisaun ne’e,” nia afirma.
Nia dehan, “Hahú husi eleisaun sira iha 2016, maizumenus iha suku 442 ne’ebé partisipa, no ba suku 10 seluk, tanba eleisaun sira-ne’e hala’o iha 2017, tuir lei, pozisaun sira-ne’e tenke tinan hitu, nune’e sira-nia pozisaun sei remata iha fulan-abril, nune’e eleisaun sira-ne’e sei hala’o iha tinan oin mai”.
Konsellu suku kompostu hosi xefe suku, delegadu no delegada aldeia, xefe aldeia sira, lia-na’in no reprezentante juventude suku, sira ne’e hotu eleitu ba mandatu tinan hitu.
Iha loron 13 outubru 2023, konsellu suku sira sei hasoru malu hodi estabelese meza eleitorál suku no simu kandidatura xefe suku sira
Enkuantu, iha loron 28 outubru 2023, asembleia aldeia sira sei hasoru malu hodi realiza eleisaun delegada aldeia ba konsellu suku, delegadu aldeia ba konsellu suku no xefe aldeia no xefe suku.
Enkuantu, karik laiha kandidatu xefe suku sira ida hetan liu metade hosi votu válidu ne’ebé hasai, asembleia aldeia sira hasoru malu hodi realiza votasaun daruak iha loron 13 novembru 2023,” esplika nota hosi ezekutivu.
Konsellu suku sira hasoru malu iha loron 08 novembru 2023 hodi hili lian-na’in no reprezentante juventude ho asentu iha konsellu suku nian.
Nune’e, iha Suku sira ne’ebé hala’o votasaun daruak hodi hili sira-nia xefe suku, konsellu suku nian sei hasoru malu iha loron 23 novembru 2023 hodi hili lian-na’in no reprezentante juventude ho asentu iha konsellu suku.
Kalendáriu ida-ne’e sei la aplika ba suku sira ne’ebé mandatu hosi sira-nia líder komunitáriu nian sei termina iha abríl 2024
Notísia relevante: STAE prevee millaun $9 ba eleisaun xefe suku
Jornalista: Osória Marques
Editór : Florencio Miranda Ximenes
