DILI, 14 setembru 2023 (TATOLI) – Sentru Nasionál Formasaun Profisionál (SNFP)-Becora sei loke formasaun iha área ospitalidade. Ba estabelesimentu kursu foun ne’e sei hetan apoiu husi Vise-Primeiru-Ministru no Ministru Turizmu no Ambiente, Francisco Kalbuady Lay.
Iha serimónia entrega sertifikadu ba formandu 113 ne’ebé termina ona kursu iha área la’ós konstrusaun sivíl, Kalbuady Lay husu ba CNFP-Becora atu aprezenta proposta ida hodi bele loke formasaun iha área ospitalidade, nune’e kapasita jerasaun foun hetan koñesimentu no kompete iha merkadu traballu.
“Ha’u husu ba Diretora SNFP-Becora tenke prepara ona proposta ida ba área ida ne’e hodi tinan oin ita bele tau orsamentu. Tanba ita-nian rain mós agora prepara oan atu tama ba ASEAN, entaun ita tenke prepara mós jerasaun foun sira atu hetan formasaun sira iha área espesializada”, governante ne’e dehan iha Becora, ohin.
CNFP-Becora ne’ebé mai ho natureza Institutu Públiku ne’e nia objetivu mak promove atividade sira iha formasaun profisionál. Kursu ne’ebé sentru ne’e fornese ona mak iha área konstrusaun Sivíl hanesan karpintaria, kanalizasaun no konstrusaun. Seluk mak iha teknolojia no informasaun (IT), instalasaun no manutensaun ár kondisionadu no soldadura, mekánika no eletrisidade. Iha naun konstrusaun mak kobre administrasaun jerál, padaria no kostura.
Kalbuady Lay dehan Governu esforsu hela atu halo sentru ne’e sai referénsia ba timoroan hotu.
Aleinde apoia kriasaun kursu foun, governante ne’e mós promete atu konstrui kampu multifunsaun ida atu ema hotu ne’ebé maka hola parte iha sentru ne’e aleinde estuda bele halo ezersísiu fíziku mós.
Diretora SNFP-Becora, Bernardete Gomes, kontente tanba sentru ne’e rasik hetan atensaun másima husi Governu, liuliu atu loke tan kursu foun iha 2024. Nia sei halo planu ida di’ak liu atu proposta ne’ebé sira sei aprezenta ne’e bele enkaixa mós iha orsamentu 2024.
“Ha’u ho ekipa sira sei tuur hamutuk atu haree planu sira ne’e, tanba atu kria kursu foun ne’e ita presiza iha planu orsamentu ida ho loloos, nune’e baihira ita aprezenta ba Governu bele hetan konsiderasaun”, dehan.
Ba kursu foun ne’ebé atu loke ne’e, Bernardete dehan importante tanba bainhira adere ba ASEAN tenke halo uluk formasaun ba joven sira hodi bele responde ba nesesidade merkadu nian tanba ema barak maka sei mai investe iha país.
Dezde SNFP hamriik iha 2001, forma ona timoroan hamutuk 5.137 (feto 2.413 no mane 2.724) ho nivel sertifikadu 1 no 2 no nivel 3 iha feto 36 no mane 169.
Aleinde fó kursu ba joven sira, SNFP-Becora mós disponibiliza formasaun ba funsionáriu husi instituisaun Estadu husi FALINTIL-Forsa Defeza Timor-Leste (F-FDTL) iha 15%, husi Polísia Nasionál Timor-Leste (PNTL) 4%, husi funsionáriu públiku 3% no husi sosiedade sivíl 2% no universitáriu 25%.
Jornalista: Tomé Amado
Editora: Maria Auxiliadora
