DILI, 14 setembru 2023 (TATOLI)–Primeiru-Ministru, Kay Rala Xanana Gusmão, konsidera desizaun ne’ebé antes ne’e foti ba reforma membru Polísia Nasionál Timor-Leste (PNTL) na’in-158 ne’e la tuir prosedimentu.
“Ida-ne’e la’ós tanba atu hatama fali sira ne’ebé reforma ne’e ba membru PNTL ativu, problema Komandante PNTL hasai sira la tuir prosedimentu, atu kuriji ne’e maka ha’u dehan hatama fali sira,” Xanana hateten ba jornalista sira hafoin reuniaun semanál ho Xefe Estadu, iha Palásiu Prezidensiál, Bairru Pité, kinta ne’e.
Xanana dehan, tuir prosedimentu molok membru ida atu ba reforma, superiór sira tenke informa antes hodi membru prepara-an ba vida sivíl.
“Iha prosedimentu, tinan-ida antes sai dehan prepara-an tinan mai ne’e atu reforma, maibé ida-ne’e derrepente de’it Komandante bolu tiha mai asina tanba dehan ema sira ne’e mak husu, ida-ne’e fora hosi prosedimentu. Ha’u hatene ida-ne’e tanba hosi ha’u-nia seguransa mós balun dehan katak pertense partidu ida ka defende partidu ida, ne’e antes eleisaun, Vise-Ministru Interiór ida uluk ne’e mak dehan tenke hasai,” Xefe Governu konta tuir.
Notísia relevante : Komandu PNTL Ofisialmente despede membru 158 ba vida sivíl
Xanana konsidera aktu ne’e politizadu, nune’e IX Governu hakarak hatama fali membru Polísia sira hodi halo tuir prosedimentu maka foin reforma.
Aleinde ne’e, membru PNTL reformadu sira mós hatama ona aktu irregularidade ne’e ba Tribunál.
“Tanba Governu ida-ne’e atu kuriji hahalok laloos sira ne’ebé akontese maka horiseik (kuarta) iha reuniaun Konsellu Ministru ami husu atu hatama filafali sira, enkuantu sé mak atu ba reforma tenke tuir prosedimentu. Rona mós katak hosi F-FDTL sira ne’ebé uluk reforma ona ne’e hakarak fali atu fila. Ida-ne’e la hanesan, kuandu sai tuir prosedimentu ne’e sai ona labele filafali,” Xanana tenik.
Iha loron 16 juñu 2023, Komandu PNTL ofisialmente despede membru 158 ba vida sivíl, ne’ebé serimónia despedida prezide direta hosi Komandante Jerál PNTL, Komisáriu Jerál Herique da Costa no hetan akompañamentu hosi Segundu Komandante Jerál PNTL, Komisáriu Pedro Belo.
Tuir estatutu pesoál PNTL lei númeru 69/2022, 28 setembru iha artigu 128, membru ne’ebé tama ba reforma ka aprezentasaun ou pasajen mak sira ne’ebé ho idade 60 ona. Aleinde ne’e, bainhira membru ida mak fízika no psikolójikamente labele halo ona funsaun hanesan membru Polísia, entaun bele tama ba reforma.
Nune’e mós, iha artigu 129 hosi estatutu pesoál PNTL fó dalan iha loron 30 abríl, Komandu Administrasaun tenke submete lista ba Gabinete Komandante Jerál PNTL atu halo publikasaun ba Jornál Repúblika.
Ho baze lei estatutu pesoál PNTL, maka hahú loron 14 novembru 2022, Departementu Administrasaun Komandu Jerál PNTL manda lista ba Gabinete Komandante Jerál. Hosi ne’ebá enkamiña ba Gabinete Ministru Interior hodi informa situsaun kona-ba membru sira ne’ebé tama ba reforma.
Iha loron 22 marsu, ofísiu ida hosi Gabinete Ministri Interiór husu atu kompleta dadus sira kona-ba saláriu, postu kada membru ne’ebé tama ba reforma, inklui saláriu désimu terseiru atu manda ba Institutu Seguransa Sosiál (INSS) atu halo kontajen ba membru PNTL ne’ebé reforma atu hetan diretu hira.
Tanba ne’e, mak iha 5 maiu halo publikasaun iha Jornál Repúblika, membru PNTL na’in-158 tama ona ba pasajen reforma.
Jornalista : Antónia Gusmão
Editora : Julia Chatarina
