iklan

EKONOMIA, HEADLINE, MUNISÍPIU, OÉ-CUSSE (RAEOA), POLÍTIKA

Komisaun C konsidera uma neen harii iha Fulolo ba afetadu sira ‘la merese’

Komisaun C konsidera uma neen harii iha Fulolo ba afetadu sira ‘la merese’

Uma neen harii iha Fulolo ba afetadu sira. Imajen mídia ZEESM.

OÉ-CUSSE 14 setembru 2023 (TATOLI – Komisun C ne’ebé trata asuntu Finansa Públika konsidera uma neen (6) ne’ebé Autoridade Rejiaun Administrativa Espesiál Oé-Cusse Ambeno harii  dezde 2017 ba afetadu sira la merese ba komunidade sira atu hela.

Prezidente Komisaun C, Deputada Cedelizia dos Santos, hateten,  uma hirak-ne’e autoridade konstrui la ho dignu, tanba kondisaun uma laiha fasilidade sufisiente ba komunidade sira hodi uza atu hela.

“Ami fiskaliza rezidénsia Fulolo, iha uma neen iha-ne’ebá, autoridade halo atu entrega ba komunidade afetadu sira, maibé iha uma-kain ida de’it mak hela iha uma ida, no uma ida seluk, fó fali ema aluga fila-fali, maibé uma sira-ne’e kuaze kondisaun ladi’ak,” Prezidente Komisaun C ne’e ko’alia hafoin halo fiskalizasaun iha Fulolo, kinta ne’e.

Notísia relevante: Autoridade RAEOA harii uma 36 troka uma tali

Tuir nia haree, kondisaun ladi’ak tanba uma hirak-ne’e, la-reboka, iha laran mós la nahe simentu, no la foru, tán ne’e maka populasaun la simu, entaun uma hirak-ne’e mós hanesan hotu abandona hela.

Nia preokupa, tanba gasta osan barak harii tiha uma sira-ne’e, populasaun sira lakohi ba hela, entaun Autoridade hosi RAEOA la buka meiu seluk ka atubele ko’alia ho populasaun, maibé realidade uma hirak-ne’e mós abandonadu.

“Ha’u sente no haree uma ne’e halo la kompletu, tanba ita halo atu fó ba povu ne’e, ita halo buat ida di’ak uitoan, tanba sira hela iha sira-nia uma mak ita ba hasai, ita dehan atu fó indemnizasaun ba sira, maibé informasaun ne’ebé ami rona, dehan sira-nia rai ne’e boot, maibé fó fali ho uma oan ida ho rai ida kloot hanesan ne’e, entaun sira mós preokupa lakohi hela, depois fó uma mós la kompletu,” nia afirma.

Notísia relevante: Komisaun C fó hanoin ba Autoridade RAEOA “labele abandona kuarentena Mahata”

“Entaun ha’u hanoin ne’e susar tebes ba populasaun sira atu hela, ne’ebé ida-ne’e mós inklui sasán abandonadu, ne’ebé maka gasta ona osan Estadu, maibé ita la uza, ida-ne’e hatudu katak laiha jestaun di’ak, tanba buat hotu-hotu jestór sira mak jere, osan bele iha, sasán bele iha, maibé rekursu umanu ne’e mak tenke iha kapasidade atu jere,” nia hateten.

Notísia relevante: PN preokupa ezekusaun OJE 2023 iha Oé-Cusse foin atinje 43%

Hatán asuntu ne’e, Sekretáriu Rejionál ba Asuntu Terra Propriedade, António Hermenegildo da Costa, informa, uma hirak-ne’e konstrui iha 2017, mandatu Prezidente Autoridade Antigu RAEOA, Mari Alkatiri.

Objetivu hosi konstrusaun halo, hosi troka uma ba komunidade sira-nia rezidénsia ne’ebé hetan afeta hosi konstrusaun moru hosi rezidénsia membru autoridade iha Fulolo, uma tali troka ho uma fatuk.

“Konstrusaun uma hirak-ne’e, atu troka uma tanba muda komunidade afetadu sira, bele hela ho dignu ba kondisaun sufisiente,” nia klarifika.

Nia informa, uma hirak-ne’e konstrui iha 2017 tanba iha konkordánsia entre komunidade afetadu, katak uma troka uma no rai troka rai ka halo kompensasaun inklui plantasaun. Nune’e Autoridade konstrui uma-kain neen (6) ne’ebé efeta hosi konstrusaun rezidénsia Autoridade iha Fulolo ne’e.

Membru autoridade ne’e esplika, uma hirak-ne’e iha tipu rua, tipu A unidade ida (1) no tipu B unidade lima (5), ho nia valór orsamentu diferente, tipu A $19,933,18 no tipu B unidade (5) $.18737,00.

“Agora daudaun komunidade afetadu hamutuk uma-kain tolu (3) maka utiliza ona, uma-kain tolu (3) seluk maka sedauk utiliza mak sai abandona hela,” nia klarifika.

António Hermenegildo da Costa, promete ba Komisaun C, katak parte sei esforsa  hodi kontinua aprosima komunidade afetadu uma-kain tolu (3) seluk,  nune’e sira bele utiliza ka hela ona iha uma hirak-ne’e.

“Tanba 2017 antes ita konstrui, iha ona konkordánsia entre komunidade afetadu ho autoridade, tán ne’e maka ita deside konstrui uma hirak-ne’e maibé to’o komunidade rasik maka lakohi hela fali, ne’e problema sira-nian, maibé nu’udar Estadu ita prepara kondisaun, tuir kapasidade Governu nian,” nia promete.

Notísia relevante: PN aprova OJE 2023 millaun $120 ba RAEOA

Jornalista   : Abílio Elo Nini

Editór          : Evaristo Soares Martins

iklan
iklan

Leave a Reply

iklan
error: Content is protected !!