iklan

NASIONÁL, ELEISAUN

MAE-STAE hahú divulga informasaun eleisaun suku ba komunidade

MAE-STAE hahú divulga informasaun eleisaun suku ba komunidade

Diretór-Jerál Sekretariadu Tékniku Administrasaun Eleitorál, Acilino Manuel Branco. Imajen Tatoli/Francisco Sony

DILI, 15 setembru 2023 (TATOLI)--Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten Ministériu Administrasaun Estatál (MAE) hamutuk ho STAE hahú ona halo sensibilizasaun no divulga informasaun kona-ba eleisaun suku ba komunidade ne’ebé responsabiliza hosi autoridade munisipál.

“Kona-ba preparasaun eleisaun suku ita hotu hatene katak ita-nia Ministru Estatál ko’alia ona no mós ita-nia Vise Ministru Estatál ba to’o munisípiu hodi divulga informasaun no halo sensibilizasaun hodi hateten ba kraik katak nain ba eleisaun suku mak komunidade en jerál resposabiliza hosi autoridade autoridade Munisipál sira no órgaun eleitorál. Hanesan ita-boot hatene iha artigu 97 da lei númeru 9/2016 ami disponibiliza apoiu tékniku sira no formasaun,” Diretór Jerál Sektretariadu Tékniku Administrasaun Eleitorál (STAE) ne’e hateten ba Agência Tatoli iha nia kna’ar fatin, Caicoli, kinta ne’e. .

Nia hateten, Komisaun Nasaionál Eleisaun (CNE, sigla posrtugés) mós hala’o ona edukasaun sivika iha fatin-fatin no STAE órgaun Ezekutivu mak fó asisténsia relasiona ho kna’ar STAE nian, nune’e oinsá bele garante eleisaun suku iha outubru 2023 ne’e la’o ho kualidade no susesu, tanba ne’e mak STAE lori garante kartaun eleitorál ba sidadaun sira hodi ba vota.

Nune’e, ekipa tékniku STAE destakadu munisípiu to’o oras ne’e kontinua halo resensiamentu eleitorál no atualizasaun baze dadus hodi garante ba 1% kada suku nian.

STAE mós apoia materiál lojistika no daudaun ne’e iha prosesu akizisaun tuir prosesu katak tarde liu loron 4-5 setembru to’o ona iha STAE, no kona-ba urna iha eleisaun suku ne’e sei la uza urna eleisaun jerál nian no atu aranza ba eleisaun suku nian ne’e ninia presosu la’o hotu ona.

“Ida-ne’e ami-nia esforsu ida-ne’ebé ami halo. Aleinde ne’e ita mós halo sensibilizasaun ba kargu dirijente/xefia sira hodi Ministériu Administrasaun Estatál iha semana kotuk. Daudaun ne’e, ita halo hela preparasaun nune’e hahú ohin ba to’o 25 setembru, tuir kalendáriu ne’ebé iha, katak nível territóriu nasionál lori sensibilizasaun ba iha entidade no sosiedade tomak atu nune’e kompreende lalaok kona-ba órgaun suku ne’e rasik,” Acilino hateten.

STAE mós fó apoiu ona ba autoridadu Munisipál no autoridade komunitária sira, oinsá bele halo preparasaun iha terrenu tanba eleisaun suku akontese iha nível aldeia, entaun presiza haree infraestrutura liuliu kondisaun sentru votasaun nian.

“Hirak ne’e ita fó ona asisténsia no oras ne’e daudaun ita kuaze konklui ona planu operasionál hodi refleta kondisaun terrenu hosi munisípiu hotu-hotu inklui RAEOA no Ataúro. Ita fó asisténsia makaas no buat hotu-hotu la’o di’ak. Aleinde ne’e, ita mós fó asisténsia téknika hodi halo rekrutamentu pesoal apoiu STAE iha aldeia no suku,” nia dehan.

Pessoal apoiu STAE nia papel mak reprezentante STAE nian atu fó asisténsia direta ba iha prosesu tomak hahú hosi reforsa sensibilizasaun iha área jeografika suku ida-ida, lori mós apoia meza asembleia suku ba prosesu kandidatura, prosesu apuramentu suku no apoiu kompilla rezultadu hodi transmite ba autoridade postu no munisipál.

“Maibé STAE sei la interven no sei la prezide no ami-nia pesoál prontu, ne’ebé hodi fó apoiu nesesáriu no pesoál apoiu STAE iha aldeia. Ita sei fó formasaun hahú 16-20 outubru iha nível postu administrativu hotu-hotu, hodi lori preparadu tanba prosesu tomak ne’e sei konsentra nível aldeia. Iha 28 outubru, nível meza aldeia sei hili ita-nia sidadaun eleitór na’in-tolu (3) ne’ebé mak lahatene buat ida no sira mak sei prezide prosesu tomak hahú hosi presosu kandidatura, jere tempu para kandidatura admitidu sira hodi hato’o sira-nia vizaun ka mini kampaña iha momentu ne’ebá, prosesu votasaun, lidera prosesu sira simu reklamasaun keixa sira. Ema ne’e sei eleze prosesu ne’ebé krusiál tebes ho tempu limitadu, oinsá sira-nia kompreensaun kona-ba lala’ok sira,” nia hateten.

Aleinde ne’e, nia dehan, suku foun ne’ebé la kompete iha tinan ne’e maibé eleitór iha aldeia suku foun nian sei kontinua fó sira-nia direitu ba órgaun konsellu suku ne’ebé sira hili, tanba sira-nia mandatu mós termina tinan ne’e, nune’e bainhira eleisaun sira entrega de’it.

Kona-ba sentru votasaun, nia haktuir, sei define tuir aldeia no la hanesan eleisaun Prezidensiál ne’ebé liu tiha ona ne’e.

Tanba ne’e, STAE husu ba sidadaun hotu-hotu katak eleisaun suku ne’ebé de’it akontese iha 28 outubru, nune’e hhalo favór boot ida atu ba rejistu no atualiza baze dadus sira, nune’e bele tuir vota no karik sé mak iha inteerese ba compete, presiza mós ajusta kartaun eleitorál.

Bainhira ladún hatene rekezitu balun bele hakat ba iha edifísiu STAE hodi konfirma no hatene tuir, nune’e mós iha loron eleisaun iha 28 outubru no aumezmu tempu aprezenta lista kandidatura xefe aldeia no delegada/delagadu nian

Tanba ne’e. iha sidadaun ida-ne’ebé iha interrese atu kompete iha elesaun suku tenke prepara aan no hato’o vizaun no programa ba públiku, tanba bainhira sai admitidu suku mak perante asembleia suku no asembleia aldeia.

“Mai ita kolabora hamutuk hodi garante eleisaun suku ne’ebé kualidade no susesu, nune’e ita bele iha kompozisaun suku tuir lei númeru 9/2016 hateten prienxe mandatu tinan hitu,” nia hateten.

Númeru eleitór provizóriu to’o fula-jullu 2023 ne’e iha totál hamutuk 893.838  ne’e, ne’e inklui mós sidadaun timoroan sira hela iha rai-li’ur.

Jornalista : Osória Marques

Editór      : Cancio Ximenes

 

iklan
iklan

Leave a Reply

iklan
error: Content is protected !!