DILI, 18 setembru 2023 (TATOLI)–Ministra Soliraiedade Sosiál no Inkluzaun (MSSI), Verónica das Dores, hateten MSSI reajusta bolsa da mãe kondisionál no entrega ekipementu ba ekipa tekniku sira tanba iha ema balun la elizivel ona no balun muda fatin entaun presiza reajusta fila-fali.
Notísia Relevante: MSSI hahú selu benefisiáriu bolsa da mãe kondisionál 45.386
“Ohin, ita halo lansamentu reajustamentu dadus ba bolsa da mãe kondisionál. Bolsa da mae kondisionál ne’e harii tinan barak ona dezde Governu dahaat nia tempu, iha Maria Domingas Fernandes Alves “Micato” nia tempu no bolsa da mãe ne’e mak sei kontinua. Tanba ne’e, IX Governu konstituisionál kontinua no agora halo lansamentu. Ita presiza reajusta tanba iha ema balun la elizivel ona no balun muda fatin entaun presiza reajusta fila-fali,” Ministra ne’e hateten ba jornalsita sira iha Caicoli, segunda ne’e.
Objetivu halo lansamentu reajustamentu ne’e atu atualiza fila-fali dadus atuál ba agregadu família ba apoiu kondisionál bolsa da mãe kondisionál atu reafirma fila-fali sira-nia elizibilidade ba programa bolsa da mãe kondisionál bazeia ba dekretu-lei nú. 19/2012, 4 abríl, artigu 31 define katak durasaun permanénsia agregadu família nu’udar benefisiáriu ba programa apoiu kondisionál bolsa da mãe durante tinan rua.
“Entaun, iha tinan rua ne’e benefisiáriu presiza atualiza sira-nia informasaun kona-ba situasaun atuál ne’ebé mak família hasoru. Tanba ne’e mak ohin ofisialmente ami atu lansa reajustamentu no entrega material ba ekipa téknika reajustamentu nian ho totál 492,” nia dehan.
Hosi 492 ne’e, nia dehan, funsionáriu MSSI nian hamutuk 107 no 385 mak funsionáriu sira-ne’ebé mak atualmente servisu iha Sentru Solidariedade Sosiál munisipál sira inklui RAEOA.
Programa ida-ne’e MSSI mós kolabora ho Ministériu Finansa (MF), Dirasaun Patrimóniu Estadu, Ministériu Administrasaun Estatál (MAE), hodi hetan apoia ba transporte no motorizada tuir nesesidade no envolve mós autoridade sira.
“Durasaun atividade reajustamentu sei implementa sumultanea iha teritórriu nasionál loron 14 setembru 2023. Nune’e, ami hakarak husu ba komunidade atu hakbesik an ba sentru sira-ne’ebé estabelese ona iha fatin reajustamentu aldeia ka suku no iha postu ida-ida, nune’e bele hetan nafatin nia direitu ba bolsa da mãe kondisionál,” nia dehan.
Orsamentu ba programa refere ne’e liu millaun $5 ho nia benefisiáriu hamutuk 55.185 ne’ebé sei eziste iha sistema MSSI nian.
Ekipa Tékniku Munisípiu Aileu, Miguel Sarmento Nunes, hateten ohin mai simu materiál hodi halo reajustamentu ba programa bolsa da mãe kondisionál iha munisípiu Aileu nian.
“Teknikamente ami halo ona sensibilizasaun ba diretór no animadór kada munisípiu sira iha semana hirak ba kotuk. No ami mós halo ona formasaun ba funsionáriu iha munisípiu sira, nune’e bele sensibiliza ba autoridade lokál, para sira bele entende didi’ak programa reajustamentu bolsa da mãe jerasaun foun ne’e,” nia hateten.
Programa bolsa da mãe kondisionál ne’e antes ne’e la’o ona no tanba de’it pandemia COVID-19 entaun paradu, nune’e ohin MSSI reajusta nune’e bele kontinua fali.
“Ita-nia programa ida-ne’e la’o ona antes maibé tan COVID labele la’o, nune’e iha tinan ne’e polítika liuhosi Ministra ami ekipa hotu-hotu bele destaka ba iha kada suku sira para halo reajusta didi’ak fali dadus. Tanba, dadus sira-ne’e hotu bele deteta tanba dala ruma balun la inklui ona iha laran, no oinsá mak balun ne’ebé mak la inklui ne’e ita buka solusaun para bele hetan nia solusaun,” nia dehan.
Jornalista : Osória Marques
Editór : Cancio Ximenes
