MSSI hahú selu benefisiáriu bolsa da mãe kondisionál 45.386
DILI, 05 junu 2023 (TATOLI)—Diretór Nasionál Asisténsia Sosiál (DNSS), Lucas Tois, hateten Ministériu Solidariedade Sosiál no Inkkuzaun (MSSI) hahú selu ona benefisiáriu bolsa da mãe kondisionál ba tinan 2022 nian hamutuk 45.386.
Notísia Relevante: Benefisiáriu bolsa da mãe atuál kondisionál 48.000 sei simu subsídiu
“Ita-nia benefisiáriu bolsa da mãe kondisionál iha territóriu nasionál ne’e ita hahú ona selu no sira-ne’e hamutuk 45.386 ho montantes $5.394.120. Maibé ida-ne’e ba tinan 2022,” Diretór Nasionál Asisténsia Sosiál (DNSS), Lucas Tois, hateten ba Agência Tatoli iha nia kna’ar fatin Caicoli, segunda ne’e.
Nia dehan, hosi númeru ne’e sei tun bainhira halo pagamentu ba 2023 nian tanba idade benefisiáriu balun aumenta.
“Iha 2023 parese la to’o ona númeru ne’ebé iha agora no automatikamente naran esklui mesak iha sistema. Nune’e, agora sei iha pagamentu nia-laran ita seidauk bele hatene hira mak sei esklui,” nia hateten.
Programa bolsa da mãe kondisionál ne’e eziste iha tinan 2012, maibé ida-ne’e bolu subsídiu eskolár entaun MSSI mós sei labele haree bolsu da mãe ba universitáriu sira.
“Entaun mai iha V Governu MSSI planu atu labele fó bolsu da mãe ba universitáriu sira tanba universidade ne’ebé kompeténsia parte ministériu edukasaun nian. Entaun, ami muda naran fali ba subsídiu bolsa da mãe kondisionál hodi jere idade hosi zero (0) to’o 17, ita bolu nove anos escolaridade obrigatóriu. Depois dekretu-lei 18/2012, abríl muda an hodi ita haree 0-17 de’it,” nia hateten.
Hosi númeru ne’e, munisípiu Aileu benefísiáriu hamutuk 2.556 ho osan $310.740; Ainaro benefísiáriu 3.300 ho osan $397.320; Baucau benefísiáriu 4.482 ho osan $504.180; Bobonaro benefisiáriu 4.199 ho osan $522.480; Covalima benefisiáriu 3.610 ho osan $390.780; Dili benefisiáriu 5.394 ho osan $625.080.
Munisípiu Ermera benefisiáriu 3.346 ho osan $406.860; Lautém benefisiáriu 3.129 ho osan $397.800; Liquiça benefísiu 3.238 ho osan $384.240; Manatuto benefisiáriu 2.520 ho osan $296.220; Manufahi benefisiáriu 3.098 ho osan $369.900; RAEOA 4.227 ho osan $445.740 no munisípiu Viqueque benefisiáriu 2.837 ho osan $342.900.
Notísia Relevante: MSSI prevee $5,394.120 ba programa bolsa da mãe atuál kondisionál
Jornalista : Osória Marques
Editór : Cancio Ximenes
