DILI, 19 setembru 2023 (TATOLI)—Konsellu Ministru delibera hodi autoriza negosiasaun no asinatura akordu ida entre Provínsia Hunan, Repúblika Populár Xina no Administrasaun munisipál Manatuto, ne’ebé sei reprezenta hosi Ministru Administrasaun Estatál (MAE), Tomás do Rosário Cabral.
“Asinatura akordu ne’e objetivu atu estabelese relasaun kooperasaun ba promosaun desentralizasaun administrativa no dezenvolvimentu lokál iha munisípiu Manatuto iha Timor-Leste, nune’e Konsellu Ministru fó podér tomak ba Ministru Administrasaun Estatál hodi asina akordu ne’e,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu, tersa ne’e.
Notísia relevante : Xanana hakarak konsensu iha implementasaun poder lokál no desentralizasaun
Iha biban hanesan, Konsellu Ministru delibera mós hodi fó autorizasaun ba asinatura akordu entendimentu entre Ministru Planeamentu no Investimentu Estratéjiku (MPIE), Gastão Sousa no Komisaun Nasionál Dezenvolvimentu no Reforma Repúblika Populár Xina, kona-ba reforsu interkámbiu informasaun sira iha área jestaun makroekonómika no planeamentu dezenvolvimentu ba médiu no longu prazu, ho objetivu atu promove dezenvolvimentu ekonómiku no sosiál país rua ne’e nian hodi permite promove, dezenvolve no reforsa komérsiu, investimentu, turizmu no interkámbiu kulturál.
Jornalista : Antónia Gusmão
Editora : Julia Chatarina
