DILI, 19 setembru 2023 (TATOLI)—Governu liuhosi reuniaun Konsellu Ministru, iha tersa ne’e, delibera ona hodi fó autorizasaun ba asinatura akordu entre Governu Timor-Leste, reprezenta hosi Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay no Governu Brunei Darussalam, ba programa haruka traballadór Timor-Leste ba serbisu iha Brunei.
“Embaixadór Timor-Leste ba Brunei, Abel Guterres, sei mai apoia iha preparasaun hosi traballadór nasionál,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu, tersa ne’e.
Notísia relevante : Embaixadór Brunei Darussalam hasoru Xanana hato’o felisitasaun
Iha fulan-agostu liubá, Embaixadór Brunei Darussalam iha Timor-Leste, Wan Hadfi Latif, hasoru malu ho Primeiru-Ministru, Kay Rala Xanana Gusmão, no informa katak atu lori timor-oan bá serbisu iha Brunei Darussalam tenke liuhosi akordu ida entre nasaun rua.
Enkuantu, númeru traballadór ne’ebé empreza presiza depende ba demanda no tenke hatene lian indonéziu no inglés.
Jornalista : Antónia Gusmão
Editora : Julia Chatarina
