BOBONARO, 25 setembru 2023 (TATOLI) – Folin foos kilograma 25 ida iha aldeia Omelai, suku Molop, postu administrativu Bobonaro, munísipiu Bobonaro hosi dólar $17 sa’e ba $19 to’o $20 kada saka.
Negosiante Kioke iha Oemelai, Alexandria Gomes Maia, deside hasa’e folin tanba sosa iha merkadu munisipál Covalima ho distánsia ne’ebé dook.
“Ha’u hola $18, mai faa’n iha-ne’e $19 tanba ha’u mai aluga tán ema-nia karreta selu $165, ami senti la hetan rendimentu, hetan oituan mós naran fa’an de’it ona, ami moris ho ida-ne’e,” nia informa ba jornalista sira iha Oemelai, segunda ne’e.
António Nascimento nu’udar abitante senti triste no preokupa ho presu foos ne’e, tanba maioria aldeia Omelai, dependénsia liu ba foos importasaun hosi rai-li’ur.
“Ema sira horisehik lokraik lori tama mai ne’e, foos Manu Vitoria saka 25 kilograma ne’e $20. Ida-ne’e prezudika tebes mai ami iha área rurál, tanba ami iha rai-lolon, natar laiha, ne’ebé karik foos laiha, ami haan de’it ba batar, fehuk, talas ho produtu seluk tán,” nia dehan.
Xefe aldeia Omelai, António de Jesus, husu ba IX Governu liuliu Ministériu Komérsiu no Indústria atu halo intervensaun ba folin foos iha merkadu nasionál no internasionál.
Tuir nia bainhira governu la halo intervensaun lalais komunidade barak sei hamlaha.
“Ami nia hare problema ne’e difikulta tebes komunidade sira, tanba iha-ne’e sira móris ho to’os, ne’ebé laiha kbiit atu sosa foos karun ida hanesan ne’e,” lider lokál ne’e hateten.
Enkuantu tuir dadus komunidade iha aldeia Oemalai, hamutuk 500 resin ho totál uma-kain 114.
Jornálista : Sérgio da Cruz
Editór : Evaristo Soares Martins
