PNTL tenke iha tradutór lian jestuál hafasil investiga kazu envolve EhD
DILI, 2t setembru 2023 (TATOLI)–Vise Ministra Soliriedade Sosiál no Inkluzaun (MSSI), Céu Brites, husu ba Polísia Nasionál Timor-Leste (PNTL) tenke iha tradutór ba lian jestuál atu nune’e hafasil halo investigasaun ba Ema ho Defisiénsia (EhD) balun ne’ebé envolve iha kazu ruma.
Notísia Relevante: Dezenvolve lian jestuál presiza kria manuál atu implementa
Vise Ministra Solidariedade Sosiál no Inkluzaun (MSSI), Ceú Brites, hateten asuntu ida-ne’e bainhira halo sensibilizasaun kona-ba EhD ba PNTL tanba sensibilizasaujn ida-ne’e importante hodi hasa’e koñesimentu ba PNTL sira.
“Presiza iha tradutór ba lian jestuál hodi fasilita komunikasaun, oinsá uza letra braille, bainhira servisu ho vítima defisiénsia matan no oinsá apoiu maluk sira ema ho defisiénsia mentál ka psikososiál. Tanba ne’e, husu ba PNTL tenke iha tradutór ba lian jestuál ne’e, nune’e fasil bainhira iha kazu sira-ne’ebé envolve Ema ho Defisiensia, liuliu iha parte investigasaun nian,” Vise Ministra ne’e hateten liuhosi nota ne’ebé Agência Tatoli asesu, kuarta ne’e.
Ministra Céu Brites rekoñese papél Programa Dezenvolvimentu Polísia Timor-Leste (PDP-TL) importante tebes iha Timor Leste hodi apoiu ofisiál no komandante polísia sira, liuliu oinsá atu apoiu ba grupu ne’ebé vulnerável liu.
Tanba, MSSI nu’udar ministériu prinsipál ne’ebé dezenvolve no Implementa Polítika Inluzaun Defisiénsia no Programa Protesaun Sosiál iha IX Governu Konstitusionál ne’e, nune’e ho nia kompromisiu mak implementa no halo promosaun ba Asaun Nasionál ba Ema ho Defisiensia (PAN-EhD, 2021-2030).
“MSSI iha programa atu la’o tuir prinsípiu inkluzaun defisiénsia no asegura katak programa sira sei la husik ema ida iha kotuk. Ita mós agradese tanba depoizde luta tinan naruk, finalmente Timor-Leste ratifika konvensaun internasionál ba direitu ema ho Defisiensia (UNCRPD) iha 17 januari 2023,” Vise Ministra Céu Brites hateten.
Tanba ne’e, governante ne’e dehan, atividade ida-ne’e importante tebes ba membru PNTL liu-liu servisu ba protesaun vítima (UEV/VPU) atu bele hatene oinsá atu apoiu ba vítima ho defisiensia ne’ebé hasoru violénsia doméstika laho violénsia seksuál ka asesu ba justisa ho dignu, prinsipál liu iha prosesu investigasaun no prosesu julgamentu iha Tribunál, no oinsá uza orgullu tanba Timor-Lese iha nia lian jestuál rasik.
Entretantu, Komandante Jerál PNTL, Komisáriu, Henrique da Costa iha nia intervensaun katak atividade workshop ida-ne’e importante tebes ba PNTL, liuliu ba komandante sira iha nasionál no munisípiu.
“Tanba ne’e, husu workshop hanesan ne’e labele para iha ne’e de’it, maibé tenke kontinua ba munisípiu sira,” nia rekomenda.
Diretór Raes Hadomi Timor Oan (RHTO), Joãozito dos Santos ho Komandante PDP-TL, Daren Booy hato’o mós liafuan motivasaun ba membru PNTL sira atu dezenvolve papel importante ida-ne’e.
Notísia Relevante:cLuciano Purificação: “Defisil aprende lian jestuál maibé la sai barreira”
Jornalista : Osória Marques
Editór : Cancio Ximenes
