DILI, 02 outubru 2023 (TATOLI) – Reprezentante Organizasaun Mundiál Saúde (OMS) iha Timor Leste, Arvind Mathur, dehan Organizasaun Mundiál Saúde (OMS) apoia nafatin Ministériu Saúde (MS) hodi prevene moras-fuan iha Timor Leste.
“Ho selebrasaun loron mundiál moras fuan ne’ebé selebra kada loron 29 fulan-setembru no tinan ida-ne’e ho tema “uza fuan, hatene fuan. Iha intervensaun OMS nian, liuliu kona-ba moras kardiovaskulár mak nafatin fó atensaun hodi rezolve fatór risku sira ne’ebé kauza moras-fuan”, Arvind Mathur, dehan ba TATOLI iha nia kna’ar fatin Caicoli.
Tuir nia, fatór risku sira, mak nafatin kontrola tabaku sira ne’ebé tama mai tanba tabaku kontribui ba moras fuan, maibé mós halo dieta saudavél no halo atividade fízika lorloron.
“Ami mós estabelese ona GYM 65 iha munisípiu ida-idak, iha teritóriu nasionál ba ema sira ne’ebé hakarak halo atividade fízika. No ami mós promove polítika sira ne’ebé bele hadi’a saúde”, nia informa.
Iha Loron Mundiál moras fuan ne’e , OMS hala’o intervensaun hothotu ho MS hodi prevene moras-fuan husi idade sedu, atu OMS fó formasaun ba pesoál saúde sira, hodi halo levantamentu ida kona-ba fatór risku ba moras-fuan iha Timor-Leste.
“Ami kontribui ona ba problema moras fuan liuhosi pakote servisu saúde oioin ne’ebé OMS fornese. Ami fó treinu ba serbisu-na’in saúde sira, hanesan oinsá atu halo screening, hodi deteta moras fuan ida-ne’e”, nia dehan.
Aleinde ne’e, atu prevene moras-fuan iha TL, OMS halo ona advokasia kona-ba presu tabaku, promove moris saudavél no estabelese sentru hapara fuma iha Timor-Leste.
Jornalista:Felicidade Ximenes
Editór : Zezito Silva
