DILI, 04 outubru 2023 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, kontinua husu sidadaun sira-ne’ebé idade to’o ona idade 17 ne’e, hakbesik ba ida-idak nia postu administrativu hodi trata kartaun eleitorál atu bele partisipa iha eleisaun suku tinan ne’e.
Notísia Relevante: Eleisaun suku: Meza eleitorál suku simu kandidatura iha 13 outubru
“Resensiamentu eleitorál ne’e aktu kontinua, tanba ne’e ita hasai númeru eleitór pursentu ida hodi entrega ona ba prezidente autoridade sira. Hafoin ne’e, ita kontinua hikas atendimentu iha postu administrativu, atu nune’e rekezitu ida atu ba vota ne’e admite de’it kartaun eleitorál. Entaun, ita fó nafatin oportunidade ba sidadaun ne’ebé foin atinje idade 16 ka 17 ba leten iha nafatin oportunidade ba rejistu,” Diretór STAE ne’e hateten liuhosi programa “Entervista Sskluziva” ho topiku “STAE nia Preparasaun ba Eeleisaun Suku” iha estúdiu Agência Tatoli, Farol, kuarta ne’e.
Ho nune’e, nia hateten, eleitór foun sira-ne’e bele ezerse sira-nia direitu votu iha ida-idak nia suku no aldeia, atu bele hili kandidatu sira-ne’ebé sei mosu iha eleisaun suku ne’ebé sei realzia iha 28 outubru 2023.
Rekezitu resensiamentu eleitorál ne’e, nia dehan, sidadaun ida tenke atualiza lori dokumentu tolu mak hanesan Billete Identidade, Pasaporte ka Sertidaun RDTL, nune’e daudaun ne’e STAE kontinua loke atendimentu ba resensiamentu iha postu administrativu sira.
“Atendimentu ne’e haree fali ba kalendáriu dekretu Governu kona-ba loron prosesu eleitorál ninian mak sei suspende atendimentu,” nia hateten.
Lei resensiamentu aktu ida kontinua depois eleisaun parlamentár termina, kontinua hikas iha nível munisípiu maibé tanba ho eleisaun suku STAE loke tan atendimentu iha nível postu administrativu iha progresu ne’ebé di’ak.
Tuir dadus ikus, nia dehan, atualizadu iha fulan hira ba kotuk rejista eleitór hamutuk 893.140-resin, ne’e signifika katak aumenta númeru kompara ho eleisaun parlamentár liu ba ne’e.
“Lista ne’e entrega ona ba prezidente autoridade iha semana kotuk, no públiku bele asesu iha administrasaun munisípiu no postu administrativu ida-idak,” nia hateten.
Prosesu eleisaun suku konsidera hanesan aktu eleitorál ida mós, nune’e bele fasilita númeru eleitór ho prosesu sira sufrájiu.
Tuir lei, suku ba sidadaun sira-ne’ebé atu ba vota tenke rejista iha resensiamentu eleitorál entaun utiliza kartaun eleitorál.
Mezmu nune’e, kartaun eleitór ne’e sai mós rekezitu ida-ne’ebé sidadaun ida atu lori kompete iha pozisaun hosi membru konsellu suku sira-ne’e, tenke aprezenta mós iha loron aprezentasaun kandidatura.
Resensiamentu ne’e importante, tanba sai mós rekezitu ida kandidatu xefe suku ida lori aprezenta hosi númeru eleitór ne’ebé iha 1% hosi suku ne’ebé nia kandidata an ba, nune’e hosi resensiamentu ne’ebé la’o ho númeru eleitór rejista daudaun 893.140-resin, STAE entrega ona ba prezidente autoridade munisípiu sira.
Jornalista : Nelson de Sousa
Editór : Cancio Ximenes
