OÉ-CUSSE, 06 outubru 2023 (TATOLI – Komisaun Nasionál Eleisaun (CNE, sigla portugés) Rejiaun Administrativa Espesiál Oé-Cusse Ambeno (RAEOA), sesta ne’e ensera ona atividade edukasaun sivíka iha suku Costa sub-rejiaun Pante Makasar hodi prepara ba eleisaun suku ne’ebé sei akontese iha loron 28 outubru 2023 ne’e.
Notísia relevante: CNE Oé-Cusse konklui edukasaun sívika iha sub-rejiaun tolu
Diretór CNE Oé-Cusse, Tomas Oqui Meta, informa, objetivu hosi edukasaun sivíka ne’e atu hasa’e koñesimentu ba sidadaun sira oinsa bele hatene prosesu aprezentasaun kandidatura, kritéria no fatin aprezentasaun kandidatura, nune’e komunidade sira bele partisipa, no kandidata-an no mós partisipa iha eleisaun suku.
Nune’e mós matadalan Lei númeru 9/2016 kona-bá prosedimentu aprezentasaun kandidatura no lala’ok eleisaun ba membru orgaun suku sira no oinsa hato’o keisa no reklamasaun karik mosu iregularudade iha prosesu eleisaun.
“Ohin ami CNE finaliza atividade edukasaun sivíka, durante ne’e ami hala’o iha suku 18, ohin sesaun ikus iha Pante Makasar, nune’e ita prepara ba eleisaun suku nian,” Tomas Oqui Meta, ba jornalista sira hafoin ensera iha suku Costa Oé-Cusse.
Nia akresenta, alvu ba edukasaun sivíka durante ne’e, CNE tarjetu ba nivél suku no aldeia, tanba hosi suku no aldeia maka presiza iha koñesimentu ba prosesu tomak, liu-liu ba lideránsa komunitária atuál.
“Tanba sira mak sei sai na’in ba prosesu eleisaun suku, no sira sei fahe tután informasaun ne’ebé simu ona hosi CNE rasik, nune’e eleisaun ne’e bele hetan partisipasaun másimu, maibé bá nivél estudante inklui fatin públiku sira, CNE sei hein desizaun hosi nasionál,” nia akresenta.
Parte CNE rekomenda nafatin ba lideránsa komunitáriu sira, sosiedade hotu, persiza partilla tután informasaun ba komunidade sira, nune’e bele iha koñesimentu lala’ok eleisaun suku, no rekomenda mós sidadaun hotu kontribui pás estabilidade nune’e povu bele ezersie direitu ho seguru.
Notísia relevante: STAE Oé-Cusse forma pesoál 18 molok destaka apoia eleisaun suku
Jestór sub-rejiaun Pante Makasar, Eurico Bobo, agradese ba orgaun eleitorál STAE ho CNE, tanba durante fulan ida tomak kobre ona suku 18, atu eleva koñesimentu hodi promove partisipasaun eleitór sir aba eleisaun suku.
“Ohin oportunidade di’ak, tanba ita sei rona direita lala’ok eleisaun suku ne’e oinsa, tanba iha 2016 la konsege realiza tanba tempu limitadu, entaun tinan ne’e ita agradese tanba hosi STAE ho CNE bele to’o suku ida-idak hala’o edukasaun sivíka ba komunidade sira,” nia orgullu.
Entretantu, kona-bá eleitór eleizivél atu partisipa iha eleisaun suku , daudaun ne’e parte STAE Oé-Cusse, dezloka ona tékniku sira iha nasionál hodi halo sinkronizasaun, maka foin hatene dadús fiksa kona-bá eleitór sira.
Maibé bezeia dadús eleitór ne’ebé partisipa iha eleisaun parlamentár iha loron 21 fulan maiu tinan 2023 hamutuk 54.291, mane 27.681 no feto 26.610.
Kona-bá sentru votasaun nian, STAE identifika ona hamutuk sentru votasaun 63, destaka iha aldeia 63 kabe ba suku 18 iah territóriu Oé-Cusse.
Notísia relevante: CNE Oé-Cusse marka ona ajenda atu realiza edukasaun sívika iha Pássabe
Jornalista: Abílio Elo Nini
Editór: Evaristo Soares Martins
