COVALIMA, 11 outubru 2023 (TATOLI) – Sekretariadu Tékniku Administrasaun Eleitorál (STAE) Covalima kria sentru votasaun 148 atu hala’o eleisaun suku iha loron 28 outubru ne’e.
Diretór STAE, Francisco Gusmão, informa katak sentru votasaun ne’e sei uza eskola sira no bainhira iha aldeia sira mak laiha edifísiu mak monta tenda hodi realiza eleisaun depende ba xefe suku no xefe aldeia sira indika fatin.
“Ita identifika ona sentru votasaun 21 mak la asesu enerjia eletriká, nune’e ita presiza informaun husi Pesoál Apoiu Suku atubele aluga jeradór komunidade nian, tanba STAE la prepara jeradór”, dirijente dehan iha kampung baru, ohin.
Munisípiu Covalima iha postu administrativu Fatululik, Fatumea, Fohorem, Tilomar, Maucatar, Suai no Zumalai ho nia suku 30 no aldeia 148.
Aloka orsamentu ba realizasaun eleisaun comunitária iha munisípiu hamutuk rihun $160 no fahe ba rúblika sira hanesan – ba formasaun profisionál $7.940, instalasaun $ 5.340, arrendementu propriedade $2.500, aluga karreta $10.800, despeza operasionál $36.222,50, serbisu profisionál $87.600 no servisu seluk $9.790.
Notísia relevante: PNTL Covalima seidauk simu lista estabelesimentu sentru votasaun husi STAE
Jornalista: Celestina Teles
Editora: Maria Auxiliadora
