DILI, 13 outubru 2023 (TATOLI) – Ohin, kandidatura xefe suku sira iha territóriu aprezenta lista ba meza asembleia suku no aldeia, tanba ne’e Ministru Administrasaun Estatál (MAE), Tomás Cabral, husu ba meza atu serbisu ho imparsiál no onestu iha prosesu verifikasaun lista kandidatura nian.
“Mensajen ba asembleia aldeia no suku tenke simu kandidatu hotu, labele diskrimina kandidatu seluk, sé-sé mak bá aprezenta tenke simu no rejistu, iha prosesu verifikasaun mak sira bele esklui, maibé tenke bazeia ba kritéria”, governante apela iha salaun VIP MAE, Colmera.
Nune’e mós nia solisita ba populasaun sira atu haree no hili figura ne’ebé mak bele lidera to’o tinan hitu no hatudu nia progresu serbisu, liuliu dezenvolvimentu suku nian.
“Iha 28 outubru, populasaun hili kandidatu ida ne’ebé mak di’ak liu hodi lidera durante tinan hitu no bainhira hili sala mak konsellu suku deside hodi halo reuniaun atu pronúnsia buat ruma”, dehan.
Governante ne’e salienta katak iha aprezentasaun lista kandidatura ohin mak latuir kritériu maka meza devolve dokumentu hodi kompleta iha loron ne’e kedan no asembleia suku no aldeia tenke iha kapasidade atu rezolve ba reklamasaun sira ba prosesu aprezentasaun kandidatura nian tanba sira iha ona formasaun ba kestaun refere.
Notísia relevante: STAE rekruta ofisiál eleitorál 2.675 apoia eleisaun suku
Kritériu ba kandidatura xefe suku mak timoroan ho idade 17 ba leten halo ona resenseamentu eleitorál hela duni iha suku no presiza kumpre rekizitu mak fotokópia kartaun eleitorál tahan 2, foto koloridu 3×4 tahan 2, prienxe formuláriu aseitasaun kandidatura, aprezenta lista apoiante 1% husi eleitór suku no ne’ebé kandidata-aan ba no fotokópia kartaun eleitorál apoiante sira.
“Ita haree potensialidade iha 2016 no 2023 volume ema atu aprezenta lista boot, signifika komunidade prepara sira-nia aan atu partisipa iha lideransa komunitária no mós xefe aldeia sira”, dehan.
Konsellu suku kompostu hosi xefe suku, delegadu no delegada aldeia, xefe aldeia sira, lia-na’in no reprezentante juventude suku, sira ne’e hotu eleitu ba mandatu tinan hitu.
Notísia relevante: Eleisaun suku: Meza eleitorál suku simu kandidatura iha 13 outubru
Jornalista: Osória Marques
Editora: Maria Auxiliadora
