iklan

INKLUZAUN SOSIÁL

SEI lansa planu estratéjiku no relatóriu serbisu loron 120

SEI lansa planu estratéjiku no relatóriu serbisu loron 120

Sekretária Estadu ba Igualdade (SEII) lansa planu estratéjiku ba tinan 2023-2028 no relatóriu loron 120 hala’o kna’ar no implementa programa IX Governu Konstitusionál, tersa (31 novembru 2023). Imajen Tatoli/Jesuína Xavier.

DILI, 31 outubru 2023 (TATOLI)–Sekretária Estadu ba Igualdade (SEII) hamutuk ho parseiru dezenvolvimentu, tersa ne’e, lansa planu estratéjiku ba tinan 2023-2028 no relatóriu serbisu loron 120 hala’o kna’ar ni implementa programa IX Governu Konstitusionál.

Notísia Relevante: SEI realiza diskusaun panel reformasaun traballadór doméstiku iha TL

Objetivu hosi lansamentu ba planu estratéjiku mak atu sai matadalan ba parseiru sira bele hatene planu prioridade hodi apoiu Governu liuhosi hametin kooperasaun.

“Governu tenke iha planu ida atu bele ajuda parseiru internasionál sira hodi bele fó apoiu ba Governu. Dokumentu válidu no matadalan ba SEI atu bele impelementa ba tinan tuir mai ba serbisu SEII nian, atu muda mentalidade ema-nian kona-ba igualdae jéneru iha Timor-Leste,”  Sekretária Estadu Igualdade, Elvina Sousa Carvalho, hateten liuhosi diskursu iha lansamentu planau estratéjiku 2023-2029 no relatóriu ba serbisu loron 120 nian iha Lecidere.

Vizaun hosi planu estratéjiku ne’e prevee katak Timor-Leste sosiedade ida-ne’ebe prósperu, nakonu ho dame, iha ne’ebé feto ho mane ho grupu vulnerável sira hotu-hotu iha direitu no obrigasaun ne’ebé hanesan iha aspetu hotu-hotu, iha moris família nian, kulturál, sosiál, ekonómika no polítika.

Nune’e, nia dehan, sidadaun hotu-hotu hanesan feto no mane timoroan sira hotu bele kontribui di’ak ba sosiedade Timor-leste nia kresimentu no dezenvolvimentu.

Misaun hosi planu estratéjiku mak SEI hakarak promove kultura igualdade no inkluzaun atu haforsa instituisaun hotu-hotu hodi asegura estratéjia abordajen integrada jéneru no orsamentu sensível jéneru konsidera iha polítika, lei, programa no orsamentu ne’ebé atu responde ba nesesidade feto, labarik feto, portadór ema ho defisiénsia, komunidade LGBTQI no grupu vulnerável seluk.

Nune’e mós, sei liuhosi hakbiit ekonomia feto, prevene violénsia bazeia ba jéneru no promove partisipasaun ativu feto nian iha vida polítika, no foti desizaun hodi kontribui ba dezenvolvimentu nasionál ne’ebé justu no ekitativu.

Iha fatin hanesan SEI mos lansa relatóriu serbisu loron 120 kona-ba atividade Governu nian ne’ebé konsege la’o iha fulan tolu liu ba ne’e.

“SEII kompleta fulan tolu hosi atividade nian. SEII promove espíritu igualdade ba ema hotu tamba hakarak lansa mós rezultadu serbisu iha loron 120, hosi 01 jullu to’o outubru, tanba SEI serbisu makaas ba asuntu igualdade jéneru iha Timor-Leste,” Diretur Jeral SEI, Armando da Costa, hateten liuhosi diskursu.

Iha relatóriu ne’e, SEI konsege atinje mak hanesan Lei Orgániku SEI nian konsege aprova iha Konsellu Ministru, Deklarasaun Maubise Faze Datoluk asina ona husi liña ministériu 19 no Banku Nasionál Komérsiu Timor-Leste, Planu Estratejíku 2023 no 2028 SEI nian aprova no lansa ba públiku, realiza komemomemorasaun loron eventuál sira, enkontru ho Asosiasaun Lideransa Feto Potensiál iha munisípiu Bobonaro, Covalima no Lautém, enkontru ho parseiru internasionál no organizasaun Sosiedade Sívil no grupu de traballu interministeriál no seluk tan.

Tuir nia, orsamentu jerál Estadu (OJE) SEI iha 2023 hamutuk $2,152,264.00 ne’e, SEI konsege ezekuta to’o 23 outubru mak hanesan atuál, obrigasaun no kompromisu hamutuk 62%.

Iha lansamentu ne’e marka prezensa hosi membru Parlamentu Nasionál, membru Governu, parseiru internasionál ba kooperasaun, sosiedade sívil, reprezentante Polísia Nasionál Timor-Leste no funsionáriu SEI.

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!