VIQUEQUE, 06 novembru 2023 (TATOLI)—Bee Timor-Leste, Empreza Públika (BTL, E.P) munisípiu Viqueque rekolla reseita hamutuk $14.778,70 durante fulan-10, hahú janeiru to’o outubru tinan ne’e.
“BTL, E.P munisípiu Viqueque daudaun ne’e konsege instala kontadór iha área ida iha Beloi hamutuk 380 ba uma-kain ida-idak inklui ba restaurante sira. Nune’e, uma-kain sira selu taxa kada fulan ba Estadu. Ha’u hanoin to’o tinan oin ami sei instala kontadór 400-resin ba uma-kain sira ne’ebé seidauk instala, liu-liu iha zona Beloi. Tanba agora sei iha distribuisaun materiál kontadór nian,” Koordenadór BTL, E.P Viqueque, Marito da Costa, hateten, iha ninia knaar fatin, Beloi, segunda ne’e.
Notísia relevante : BTL, E.P Viqueque rekolla reseita $3.000 resin iha trimestre daruak
Tuir dadus, fulan-janeiru rekolla reseita $$1.856,90, fevereiru $1.543,60, marsu $1.845,20, abríl $797,40, maiu $1.624,40, juñu $1.296,60, jullu $1.307,60, agostu $1.248, setembru $1.099,20 no outubru $2.159,80.
Aleinde ne’e, rekursu bee hosi Loihunu antes ne’e oferese bee 20 litru pur segundu, maibé daudaun ne’e tama ona ba bailoro.
“Ita daudaun tama ona ba bailoro, nune’e bee Loihunu ninia kuantidade hahú menus uluk litru 20, maibé agora litru/segundu 13. Entaun litru hitu maka lakon tanba afeta hosi bailoro ida-ne’e,” nia akresenta.
Daudaun ne’e BTL, E.P Viqueque enfrenta menus rekursu umanu hodi kontrola distribuisaun bee mai kapitál Viqueque.
“Rekursu ne’ebé maka iha na’in-12, ami sente difikuldade ba ami hodi kontrola distribuisaun bee hosi rekursu bee-matan Luihuno mai kapitál Viqueque,” nia tenik.
Jornalista : Vitorino Lopes da Costa
Editora : Julia Chatarina
