DILI, 07 novembru 2023 (TATOLI) – Xefe Departamentu Kontrolu Kualidade Komunikasaun Sosiál iha Hospitál Nasionál Guido Valadares (HNGV), Sara Maria Xavier, informa bebé ne’ebé mate (Fila) iha inan nia kabun laran, iha fulan outubru, hamutuk 13.
“Durante fulan outubru, bebé ne’ebé mate iha inan nia kabun laran hamutuk 13, husi númeru ne’e na’in haat mak mate ho fresh stilberth no na’in sia mak mate ho maceradu”, Sara Maria Xavier dehan iha nia kna’ar fatin HNGV, ohin.
Nia dehan, bebé ne’ebé mak mate iha inan nia kabun laran ho razaun pezu kiik bainhira moris ka ho kondisaun prematur, entaun sira-nia kondisaun la salva.
“Bebé mate inan nia kabun laran tanba ho pezu kiik, kauza husi komplikasaun ne’ebé mak inan hetan durante isin rua, hanesan hipertensaun, animea, moras krónika ne’ebé durante sira hetan iha tempu isin rua, entaun bele kauza ba bebé mate iha inan nia kabun laran”, nia hateten.
Tanba ne’e, Sara Maria husu ba inan isin rua sira atu presiza kontrola rutina hodi hetan tratamentu banhira hetan moras komplikasaun ruma.
“Ha’u husu ba inan isin rua sira hodi nafatin kontrola rutina iha fasilidade saúde sira atu hetan tratamentu”, nia dehan.
Nia esplika, durante ne’e, inan isin rua sira mós hetan promosaun saúde kona-ba observa sira-nia movimentu vitál loron ida, tenke liuhosi dala 10, maibé banhira menus signifika bebé nia kondisaun iha ameasadu, entaun inan refere tenke lalais ba sentru saúde ne’ebé mak besik hodi hetan atendimentu.
“Durante isin rua, inan isin rua tenke hadook aan husi membru família sira ne’ebé mak fuma iha uma laran tanba kauza buat sira ne’e halo bebé mate iha inan nia kabun laran, bele mós mai husi ahi matan husi dapur nian, entaun halo bebé labele hetan osijéniu adekuadu mak ikus mai fó impaktu ba bebé hodi labele dada iis no bele mate”, nia haktuir.
Nia hateten, inan sira-nia iha nutrisaun la di’ak, ida-ne’e mós fó impaktu ba bebé, tanba ne’e, presiza han hahan ne’ebé mak iha nutritivu atu bele hadiak bebé nia kondisaun iha kabun laran.
Iha fulan outubru, totál inan sira ne’ebé mak mai baixa iha maternidade hodi partu hamutuk 534. Husi inan sira ne’e partu normál hamutuk 357, partu sezariana hamutuk 114 no partu ventoza hamutuk 65.
Inan sira ne’ebé mak partu ho bebé nia kidan mak uluk hamutuk 22 no inan mate iha na’in ida tanba kauza husi komplikasaun. Totál bebé moris husi inan ne’ebé mak partu hamutuk 544 tanba bebé balun kaduak.
Jornalista : Felicidade Ximenes
Editór : Zezito Silva
