DILI, 11 novembru 2023 (TATOLI)— Primeiru-Ministru, Kay Rala Xanana Gusmão, husu Sekretariu Estadu Igualdade (SEI), kontinua kaer-metin vizaun no misaun atu valoriza no proteze dignidade direitu humanu, inklui direitu feto sira nian.
“Hala’o servisu ho kualidade no profisionál atu bele fó susesu ba vizaun atu promove kultura igualdade jéneru iha Timor-Leste,” Xanana Gusmão hateten, bainhira vizita edifísiu SEII Caicoli, ohin.
Vizaun SEI nian mak Timor-Leste nu’udar nasaun ida ne’ebé prósperu no nakonu ho dame ho sosiedade ida ne’ebé justu ba jéneru ne’ebé ninia lei no kultura valoriza, proteze no promove dignidaei no direitu humanus, inklui direitu sira feto sira nian.
No, misaun mak buka atu promove kultura Iguldade Jéneru. SEI iha autoridade no responsabilidade atu implementa programa abordajen jéneru sira no atu fó influénsia ba lei no polítika sira atu halo sira iha sensibilidade ba jéneru. Inklui, sensibilizasaun públiku no koñesimentu ba nesesidade atu promove Igualidade Jéneru, halakon diskriminasaun no violénsia hasoru feto; fó advokasia ba polítika nasionál no setorál ne’ebé rekoñese kontribuisaun feto sira ba sosiedade.
Dezenvolve edifísiu própriu
Iha biban ne’e, Xefe governu mós husu SEI atu dezenvolve tan edifísiu própriu atu nune’e bele servisu ho kualidade no profisionál ba povu Timor-Leste.
“Aproxima tebes ba SEI nia servisu durante ne’e luta ba iha Igualdade Jéneru. Tanba ne’e, ba oin tenke dezenvolve tan edifísiu própriu atu bele hala’o servisu ho di’ak,” nia haktuir.
Igualdade feto no mane iha artigu 17 Konstituisaun Repúblika Demokrátika Timor-Leste (RDTL) hateten, Feto no mane iha direitu no obrigasaun hanesan iha moris família, kulturál, sosiál, ekonómiku no polítiku nia laran.
Timor-Leste mós adota implementasaun Objetivu dezenvolvimentu sustentável (ODS) ho meta-17. Husi meta ne’e, meta númeru lima (5) ko’alia kona-ba Igualdade Jéneru. Objetivu ida ne’e kona-ba hapara violénsia no diskriminasaun kontra feto no labarik feto sira no garantia katak sira iha oportunidade sira ne’ebé hanesan iha área sira hotu iha sira-nia moris.
Iha fatin hanesan, Sekretaria Estadu Igualdade (SEI), Elvina Sousa, agradese ba Primeiru-ministru, Kay Rala Xanana Gusmão, tanba mai direita haree edifísiu ida ne’e.
“Presenza PM ohin mai ne’e fó matak-malirin mai ami; funsionáriu tomak nia mehi mak hakarak iha edifísiu própriu atu nune’e bele servisu ho kualidade ba povu ida ne’e,” nia dehan.
Membru governu ne’e esplika, Primeiru-ministru nia vizita direita ba edifísiu ne’e hodi haree rasik atu nune’e ba oin bele hadi’a hodi presta servisu SEI nia sai diak iha futuru.
“Ita haree katak ami-nia edifísiu daudaun ne’e seidauk seguru atu ami hala’o ami-nia atividade lorloron tanba edifísiu ne’e rasik harii tinan naruk ona entaun ida ne’e mak ba oin atu hadi’a,” ezekutiva ne’e informa.
Entertantu, Orsamentu adisionál atu harii no konstrusaun edifísiu foun SEI iha 2024 hamutuk $200.000.
Jornalista : Felicidade Ximenes
Editór : Rafael Ximenes de A. Belo
