DILI, 14 novembru 2023 (TATOLI) – Xefe Suku eleitu Afaloicai, Postu Administrativu Uatucarbau, munisípiu Viqueque, ba períodu 2023-2030, Abilio Soares, promete katak sei tau prioridade ba joven sira hodi garante pás no estabilidade iha aldeia haat iha suku refere.
Kandidatu Xefe Suku Abilio Soares, ho númeru sorteiu ida (1), konsege hetan vitória iha volta daruak ho votu 379 hodi liu kandidatu Agostinho Pinto atuál xefe suku Afaloicai, ho númeru sorteiu rua (2) ho votu 274.
Notísia relevante: Alexandre: Xefe Suku eleitu sira serbí komunidade ho laran
“Ha’u agradese ba komunidade, liuliu inan-aman, joven feto no mane, veteranu no lian na’in sira iha suku Afaloicai tomak ne’ebé liuhosi prosesu demokrátiku fó votu konfiansa mai ha’u atu sai xefe suku. Ho votu konfiansa mai ha’u promote sei sai servidór ne’ebé hakuak komunidade hotu hodi promove unidade garante dezenvolvimentu ne’ebé partisipativu iha suku laran”, hatete Xefe Suku eleitu ne’e ba Agência TATOLI, liuhosi via telefónika.
Ho konfiansa ne’e, nia dehan sei servi komunidade tuir kompetensia lei suku ho númeru 9/2016, iha ne’ebé atribui ona, iha artigu 6 kona-ba kompeténsia sira.
Ho derivasaun hosi kompeténsia hirak ne’e, nia define ona programa sira prioritáriu ne’ebé sai projetu importante ba ‘’bem comum’’ komunidade nian.
“Ha’u nia programa prioridade mak atu halo konsolidasaun ida iha suku laran hodi joven sira bele hametin pás no estabilidade. Tanba durante tinan barak ona joven sira iha suku laran la kria unidade, nune’e ha’u sei halo sira tuur hamutuk no garante unidade hodi kontribui ba prosesu dezenvolvimentu iha suku laran”, nia promote.
Totál eleitór ne’ebé ezerse nia direitu votu na’in-653, nune’e Xefe suku eleitu ne’e konsege hetan votu iha aldeia Laku-Huu hamutuk 42, Lekiwala nain-92, Caiwailita na’in-72, Darlari na’in-173. Enkuantu kandidatu Agostinho Pinto, rekolla votu iha aldeia Laku-Huu na’in-31, Lekiwala na’in-76, Darlari na’in-44 no Caiwailita na’in-123.
Re-lembra katak, Iha loron 13 outubru 2023, kandidatu xefe suku sira iha suku Afaloicai aprezenta lista ba meza asembleia suku no aldeia na’in-lima, kompostu husi mane na’in-haat no feto na’in-ida.
Notísia relevante: Joaninha Alves eleita sai xefe suku Bairru-Pité ho votu 5.489
Jornalista : Fransisco Sony
Editór : Florencio Miranda Ximenes
