Arsénio Bano la partisipa komemorasaun loron Proklamasaun Independénsia
OÉ-CUSSE, 28 novembru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, tersa ne’e lá partisipa iha serimónia komemorasaun loron proklamasaun independénsia 28 novembru ba dala-48 iha Oé-Cusse Amben, tanba kondisaun saúde la permite.
Serimónia komemorasaun loron proklamasaun independénsia 28 novmebru iha Oé-Cusse, realiza iha kada sub-rejiaun dirije direita hosi membru Governu sira, no iha Pante Makasar dirije hosi Ministru Interiór, Francisco Guterres.
Notísia relevante: RAEOA aloka rihun $4 komemora 28 Novembru
Ministru Interiór, Fransisco da Costa Guteres, hateten, maske Preidente Autoridade auzente maibé konsellu Suku no jestór sira hamutuk no povu Oé-Cusse partisipa hodi valoriza loron nasionál ne’e.
“Ha’u lakohi fó komentáriu, Ministru Administrasaun Estatál mak sei ko’alia ba ida-ne’e, maibé Sekretáriu Rejionál ida-mai ho jestór no xefe suku ho Konsellu Suku sira ohin mai hotu, ne’e fó ona valór ida ba povu Oé-Cusse, katak kontinua hala’o dezenvolvimentu ba oin,” Francisco Guteres, ko’alia iha ámbitu komemorasaun loron proklamasaun independénsia 28 novmebru iha Oé-Cusse.
Notísia relevante: Arsénio Bano no membru autoridade rezigna-an
Nia husu povu Oé-Cusse, atu hamutuk, karik iha mudansa ruma iha nível altu, nu’udar povu kontinua mantein tenke servisu nafatin, koopera ho Governu Lokál, iha futuru se mak mai atu lidera fali Oé-Cusse, simu no koopera malu atu haree dezenvolvimentu iha Oé-Cusse la’o ba oin.
“Ne’ebé lalika haree fali se mak atu mai, maibé haree ema ne’e halo saida ba rai ne’e, ema-ne’e ninia hanoin ba rai ne’e saida, hanoin di’ak, ita apoia atu dezenvolve rai ne’e sai di’akliu,” nia afirma.
Prezidente Komisaun Organizadóra ba komemorasaun atuál Sekretáriu Rejionál ba Asuntu Administrasaun, Martinho Abani Elo, hateten, antes ne’e Autoridade dezloka membru autoridade sira iha sub-rejiaun haat, atu akompaña tomada pose ba Konsellu suku sira.
“Ita espera ohin sekretáriu rejionál prezensa iha sub-rejiaun tolu, bá Prezidente Autoidade la prezensa, tanba horisehik to’o ohin, Prezidente Autoridade nia kondisaun saúde la permite, tán ne’e maka ohin la marka prezensa iha serimónia loron nasionál ne’e,” nia informa.
Arsénio klarifika razaun
Hatán ba kestaun ne’e, Prezidente Autoridade Rejiaun Administrativa sEspesiál Oé-Cusse Ambeno (RAEOA), Arsénio Paixão Bano, klarifika razaun la partisipa iha serimónia komemorasaun loron Proklamasaun Unilaterál Independénsia 28 Novembru iha Oé-Cusse tanba prezensa membru Governu sira hosi Governu Sentrál lá respeita no laiha konsiderasaun ba Autoridade RAEOA.
“Ha’u la partisipa tanba Governu Sentrál haruka membru Governu sira mai iha Oé-Cusse la konsidera autoridade, ida-ne’e laiha respeita tanba laiha konsiderasaun ba Autoridade RAEOA, maibé ha’u haruka nafatin funsionáriu sira ba tuir serimónia refere,” Arsénio Bano ba Agência Tatoli liuhosi telefónika, tersa ne’e.
Notísia relevante:Arsénio Bano la partisipa komemorasaun loron Proklamasaun Independénsia
Bano, informa, tuir loloos prezensa membru Governu iha Oé-Cusse la presiza no bainhira mai karik kordena didi’ak uluk, liuhosi audiénsia ho Autoridade RAEOA nu’udar konsiderasaun molok dirije loron Proklamasaun Independénsia iha Oé-Cusse.
“Tanba to’o ohin loron lei númeru 3/2024 sei vigora hela, molok lei ne’e hetan promulgasaun husi Prezidente Repúblika,” nia katak.
“Maibé sira mai, ha’u rasik la koordena, tanba Autoridade RAEOA sei ativa hanesan bainbain, hodi hein karta ofisiál resposta hosi Primeiru Ministru, sira mai nonok de’it, entaun ha’u deside lakohi partisipa, maibé ha’u nafatin akompaña direita iha televizaun liuhosi transmisaun direita hosi nasionál,” nia afirma.
Prezidente Autoridade RAEOA, Arsénio Paixão Bano, mós hato’o parabéns ba Konsellu Suku sira iha Oé-Cusse, tanba iha ámbitu komemorasaun loron proklamasaun independénsia, simu ona pose ba períodu 2023-2030.
Notísia relevante:Kompromisu Konsellu Suku Pante Makasar, ‘hametin independénsia-unidade nasionál’
Notísia relevante: Arsénio husu povu Oé-Cusse kontinua servisu ho vontade no hein autoridade foun
Jornalista: Abílio Elo Nini
Editór: Evaristo Soares Martins
