DILI, 30 novembru 2023 (TATOLI) – Ministériu Edukasaun (ME) aprezenta ona proposta Orsamentu Jerál Estadu (OJE) 2024 hamutuk millaun $114,9 ba Komisaun G ne’ebe trata asuntu Edukasaun, Juventude, Kultura no Sidadania molok lori ba diskusaun iha jeneralidade.
Ministra Edukasaun, Dulce de Jesus, informa katak aprezentasaun ba proposta OJE ministériu nian ba tinan oin la’o di’ak no Prezidente Komisaun G, Armando dos Santos Lopes, apresia tebes programa sira ne’ebe maka ME tau ona atu aselera prosesu dezenvolvimentu edukasaun iha país.
“Audénsia ho komisaun G ne’e la’o di’ak tebes tanba ami foka liu ba programa prioridade lima ne’ebé trasa ona”, Dulce de Jesus hatete iha Parlamentu Nasionál, ohin.
Orsamentu ne’ebé ME prevee ba 2024 ne’e ba programa prioridade sira maka hanesan funsionamentu no dezenvolvimentu institusionál, edukasaun pré-eskolár, ensinu báziku, sekundáriu no rekorrente.
Verba ne’e aloka tuir kada kategoria sira mak hanesan saláriu no vensimentu millaun $87,4, bens no servisu millaun $11,4, transferénsia públika millaun $9,3, kapitál menór millaun $1,8 no kapitál dezenvolvimentu millaun $5.
Prezidente Komisaun G, Armando dos Santos Lopes, afirma katak audénsia ne’ebé ohin halo ona ho ME ne’e foku liu ba orsamentu 2024 hodi implementa programa prioridade lima, maibé komisaun konsidera katak verba ne’ebe ministériu prevee ne’e seidauk sufisiente.
“Ami hato’o ona ba ministra katak mezmu OJE Ministériu Edukasaun nian ne’e menus, importante liu maka tenke ezekuta ho didi’ak atubele taka tinan 2024 ne’e ho 100%”, dehan.
Armando Lopes salienta katak nu’udar reprezentante povu iha Parlamentu sei kontinua halo fiskalizasaun ba ezekusaun sira, nune’e bele hetan ninia rezultadu. Prezidente ne’e mós tau esperansa ba Edukasaun katak mezmu ho osan ne’ebé ki’ik, maibé ninia implementasaun tenke di’ak bazeia ba kbiit ne’ebé iha duké aloka osan boot, maibé rezultadu implementasaun ladi’ak, entaun labele ezekuta hotu no ikus mai filafali ba kofre Estadu.
Rekorde katak OJE Ministériu Edukasaun nian ba tinan ne’e hamutuk millaun $122,5 ne’ebé destina ba kategoria saláriu no vensimentu millaun $80, bens no servisu millaun $19-resin, transferénsia públika millaun $17,9, kapitál menór millaun $3, kapitál dezenvolvimentu millaun $1,9. Verba ne’e ezekuta ba planu no programa prioridade tolu ne’ebé maka trasa ona mak boa governasaun no institusionál, edukasaun no formasaun no inkluzaun sosiál.
Orsamentu Ministériu Edukasaun nian iha tinan 2022 hamutuk millaun $93,7 no konsege ezekuta 92,5%.
Notísia relevante: Ezekusaun orsamentu Ministériu Edukasaun atinje 67%
Jornalista: Tomé Amado
Editora: Maria Auxiliadora
