Ezekusaun orsamentu Ministériu Edukasaun atinje 67%

DILI, 26 outubru 2023 (TATOLI) – Ministériu Edukasaun ezekuta millaun $82,2, ekivale 67% husi total orsamentu ba tinan ne’e hamutuk millaun $122,5, informa Diretór Nasionál Administrasaun no Finansa, José dos Santos.

“Ha’u garante katak ho ezekusaun hanesan ne’e molok to’o dezembru tinan ita-nia bele atinje to’o 90% tanba husi fulan novembru to’o dezembru ne’e ita sei ezekuta barak liu ba saláriu”, José Santos hatete ba Tatoli iha Vila Verde, ohin.

Dirijente ne’e esplika katak ezekusaun orsamentu husi janeiru to’o 23 outubru, ho montante millaun $82,2 ne’e ba kategoria saláriu no vensimentu ba profesór permanente, kontratadu nomós ajente administrasaun hamutuk rihun 15-resin ne’ebé ezekuta ona millaun $57, equivale ba 71%, husi verba $80,3.

Ba kategoria bens no servisu nian ezekuta ona millaun $10,9, ekivale ba 56,6%, husi totál orsamentu alokadu millaun $19-resin, transferénsia públika ezekuta ona millaun $10,3, ekivale ba 57,6%, husi totál millaun $17,9, kapitál menór foin maka ezekuta millaun $1,2 ka 39,5% husi totál millaun $3. Ba kapitál dezenvolvimentu ezekuta ona millaun $834,2, ka 41,9% husi millaun $1,9.

“Orsamentu ne’ebé seidauk ezekuta hamutuk millaun $40,8 ekivalénsia ba 33,3% no sei kontinua ezekuta fali iha novembru to’o dezembru tinan ne’e”, adianta.

Verba ba Ministériu Edukasaun ne’e bazeia ba planu no programa prioridade tolu ne’ebé maka trasa ona mak boa governasaun no institusionál, edukasaun no formasaun no inkluzaun sosiál.

Lembra katak orsamentu ba Ministéiu Edukasaun iha tinan kotuk hamutuk millaun $93,7 no konsege ezekuta 92,5%.

Notísia relevante: MEJD ezekuta ona 22,6% husi orsamentu ba tinan 2023

Jornalista: Tomé Amado  

Editora: Maria Auxiliadora