DILI, 27 abríl 2023 (TATOLI) – Diretór-Jerál Administrasaun no Finansa, Antoninho Pires, informa Ministériu Edukasaun, Juventude no Desportu ezekuta ona, iha primeiru trimestre, 22,6% husi Orsamentu Jerál Estadu (OJE) 2023 husi montante alokadu millaun $122,3.
“Loloos ne’e taxa ezekusaun Ministériu Edukasaun nian foin mak atinje 12%, maibé ita akumula hosi obrigasaun no kompromisu ne’e maka sa’e ba 22,6%”, dehan Antoninho Pires ba Tatoli iha Vila Verde, kinta ne’e.
Diretór-jerál ne’e informa katak husi taxa ezekusaun refere, barak liu mai husi pagamentu ba infraestrutura, ba saláriu no ba apoiu ekipamentu ba eskola sira.
“Ita iha projetu komunitáriu no kapitál dezenvolvimentu ne’ebé kria iha tinan kotuk hamutuk 202 [ba konstrusaun no reabilitasaun] eskola iha territóriu. Ita konsege finaliza ona eskola hamutuk 152, nune’e ninia ezekusaun atinje ona 70%”, nia relata.
Husi eskola 152 ne’ebé finaliza no hetan ona inaugurasaun iha faze dahuluk mak iha Baukau hamutuk 94 no ba faze daruak 58 iha Bobonaro, nune’e konsege ezekuta ona millaun $15 ba área infraestrutura.
Relasiona ho pagamentu ba saláriu, ezekuta ona millaun $65, enkuantu ba ekipamentu eskolár nia ne’e foin atinje 25%.
Tuir Portál Transparénsia, MEJD nian orsamentu hamutuk millaun $122,3 ho nia taxa ezekusan atinje 22,6%, kompromisu millaun $3, obrigasaun millaun $5,2, atuál millaun $22,5 no saldu millaun $91,6.
Jornalista: Tomé Amado
Editora: Maria Auxiliadora
