VIQUEQUE, 13 dezembru 2023 (TATOLI)—Sekretáriu munisípiu Viqueque, Teotónio Sarmento da Silva, ekonraja Uniaun Nasionál Eskuteiru Timor Leste (UNE-TL) munisípiu Viqueque atu kontinua haburas espíritu voluntarizmu iha sosidade.
“Ha’u enkoraja estrutura no membru UNE-TL sira-ne’ebé eziste iha munisípiu Viqueque atu nafatin hatudu espiíritu voluntarizmu ba sosiedade atubele motiva sira. Tanba atu haforsa estrutura UNE-TL tenke liuhosi espíritu voluntarizmu hodi promove no dezenvolve di’ak liután movimentu eskuteiru”, Teotonio Sarmento, hateten hafoin partisipa konsolidasaun UNE-TL, iha sede suku Uma-Ki’ik, kuarta ne’e.
Notísia relevante : UNE-TL na’in-25 partisipa Jambore Mundiál iha Korea Súl
Nia konsidera, konsolidasaun UNE-TL iha nível munisipál nu’udar meiu ida hodi hasoru obstákulu no dezafiu sira-ne’ebé durante ne’e enfrenta.
“Ho konsolidasaun mak ita bele hametin no hamoris hikas espíritu voluntarizmu atu ita bele kontinua promove no dezenvolve di’ak liután UNE-TL iha futuru,” nia hato’o.
Atividade konsolidasaun ne’e hetan partisipasaun hosi reprezentante Komandante PNTL munisípiu Viqueque, Autoridade lokál, no estrutura inklui membru UNE-TL iha munisípiu Viqueque.
Jornalista : Vitorino Lopes da Costa
Editora : Julia Chatarina
