DILI, 25 dezembru 2023 (TATOLI)– Padre selebrante Misa iha Parókia Maria Auxiliadora Comoro-Dili, Anacleto Pires, SDB, hateten espíritu selebrasaun santo Natál hanorin sarani katóliku ka ema-hotu hatene haraik-an ka umildade hodi serbí malu ho domin no dame.
“Natál sai furak no iha valór liu husi prezente domin ema ida-idak ba Kosok Oan liu hosi domin ba nia maluk. Presente saída mak ha’u fó ba Jesus halo nia tinan ohin? Ha’u nia presente ba Jesus mak hadomi ha’u nia maluk sira hanesan Jesus hadomi ha’u. Presente ba Jesus mak perdua ha’u nia maluk”, Padre ne’e hateten bainhira prezide misa iha Igreja Maria Auxiliadora, segunda ne’e.
Padre ne’e esplika Maromak haruka nia oan mane mai mundu atu ema hetan salvasaun hasai povu husi nakukun ba Naroman, tanba Maromak hadomi nia povu.
“Uluk Liu Maromak hatudu nia aan Liu husi profeta sira, agora Maromak revela ka hatudu nia aan ba ita atu ita haree nia hahú hosi prezépiu Belém, Nazaré, Galeleia no Kalvário. Hato’o mai ita katak imi hadomi malu ba hanesan ha’u hadomi imi”, Padre ne’e fó hanoin.
Maromak hatudu nia simplisidade halo nia aan hanesan ema hodi moris iha balada fatin, la’ós iha prezepiu furak iha dalan ka estrada ninin de’it.
“Prezente bo’ot no di’ak ne’ebé aprezenta iha prezÉpiu mak domin no dame iha família, aldeia, suku no sosiedade laran”, Amu afirma.
Maromak nia espíritu atubele hetan rahun di’ak tanba Jesus Kristu mak grasa úniku ba sarani-sira nian.
Nune’e, Amu ne’e husu ba sarani katótolika iha selebrasaun festa Natál tenke fó domin ba malu no perdua malu hodi fahe domin ba malu no fó ksolok ba malu.
Alende ne’e, Saserdote ne’e husu ba sarani sira atu refleta iha nia fuan katak “ha’u iha domin ka ódiu vingansa no buat a’at moris iha família no sosiedade”.
Padre Anacleto Pires hato’o dezeja no mós parabéns no ksolok loron Natál ba ema ida-idak, família no sosiedade Kristaun hotu.
Notísia relevante: Don Virgílio Kardeál apresia inisiativa Governu hametin dame-domin iha TL
Jornalista: Jesuína Xavier
Editór : Florêncio Miranda Ximenes
