DILI, 26 dezembru 2023 (TATOLI)– Ekipa hosi Klubu Futeból AD SLB Laulara kompostu hosi jogadór mane na’in-19, asistente na’in-ida, ho ofisiál na’in-neen, tersa-ne’e desloka ba Melbourne, Austrália hodi reprezenta Timor-Leste partisipa iha jogu Timor CUP 2023.
Xefe Ekipa Jogadór Klubu Futebol AD SLB Laulara, Nivia Reis Silva Caldeiras, hateten, jogu ne’e rasik sei abertura iha loron kuarta (27/12), sei partisipa hosi jogadór di’ak hosi klube oin-oin hosi Austrália.
Jogu Taxa Timor CUP 2023, nu’udar eventu ne’ebé kada tinan timor-oan sira organiza iha Austrália hodi fahe taxa ba jogadór feto no mane, inklui halo selesaun ba jogador ho kategoria jogu di’ak sei hetan premiu oin-oin.
“Ohin ami hosi Klubu Futebol AD SLB Laulara mane na’in-19, asistente treinadór ida, hamutuk ho ofisiál na’in-neen desloka ba Melbourne-Austrália hodi partisipa iha jogu Timor CUP”, Nivia Reis hateten, iha Aeroportu Comoro, tersa ne’e.
Molok aranka, ekipa jogadór ho ofisiál sira hamutuk ho Embaixadór ba Foin Sa’e ho Diversidade Hotu-Hotu, Kay Olok Gusmão hala’o enkontru ho Prezidente Klube AD SLB, Laulara, Kay Rala Xanana Gusmão hodi fó mensajen ba sira atu partisipa jogu ne’e ho disiplina hodi respeita regra hotu hamorin Timor-Leste nia naran iha desportu.
“Mensajen ne’ebé Prezidente Klubu AD SLB Laulara, Kay Rala Xanana Gusmão hato’o ba jorgadór sira maka ba hanesan Embaixadór di’ak ida reprezenta Timor-Leste, iha jogu manán ka lakon, jogadór sira nafatin disiplina hodi aprende esperiénsia jogadór rai-seluk nian hodi mai dezenvolve jogadór sira-nia talentu hodi kontribui ba dezenvolvimentu desportu iha Timor-Leste”, Responsável ne’e haktuir.
Treinadór, Mr King husu atu jogadór sira hatudu jogu ho disiplina no unidade hodi lori ekipa susesu durante partisipa jogu.
“Joga ho di’ak, tenke sódidu nafatin durante jogu, nune’e Imi sei hetan Susesu”, nia subliña.
Entretanto, ekipa Jogadór sira to’o Melbourne Austrália sei simu hosi timor-oan sira ne’ebé durante apoia eventu Timor CUP no fó apoia ba Klube AD SLB.
Jornalista : Antónia Gusmão
Editór : Florencio Miranda Ximenes
