DILI, 04 janeiru 2024 (TATOLI) – Jurista Sergio Quintas, husu ba Governu atu aselera implementasaun lei organizasaun judisiária iha 2024.
Nia dehan, lei organizasaun judisiária ne’ebé entra vigór ona iha 2022, tuir lolos implementa ona iha 2023, maibé sei hein tanba Governu haree kondisaun balun lei ne’e molok ba ninian implementasaun.
Tanba ne’e, nia husu atu hakarak ka lakohi iha 2024, Governu tenke tau prioridade hodi aselera ninia implementasaun. Tanba lei ne’e di’ak no bele lori justisa besik liu povu no povu bele sente asesesu ba justisa to’o iha área remota.
“Tuir ha’u nia koñesimentu katak implementasaun ba lei organizasaun judisiária ne’e nesesáriu ona, só nia implementasaun de’it, tanba ne’e iha 2024 Governu tenke tau prioridade atu implementa lei ne’e”, Sergio Quintas hateten ba jornalista sira iha Tribunál Judisiál Primeira Instánsia, kinta ne’e.
Nia dehan, provizoriamente Tribunál Judisiál Primeira Instánsia sei haat, maibé kuandu Governu implementa ona lei organizasaun judisiária mak sei estabelese Tribunál iha munisípiu hotu, sei estabelese mós Supremu Tribunal Justisa, Tribunál Administraitiva Fiskál no Konta, Tribunál por menór, no Tribunál Militár.
Sergio esplika, iha lei organizasaun judisiária mós define klafikasaun ba Juiz sira liuliu atendimentu ba kazu sira hanesan Juiz ne’ebé tutela ba krime ne’e sei ka’er kazu krime no ida ka’er kazu sivil ne’e nia ka’er kazu sivíl ne’ebé iha espesifikasaun ne’e klaru ona.
“Ha’u hanoin ita hahú ona konsolida iha rekursu umanu iha setór justisa tanba kandidatu Juiz sira hamutuk 50 ne’ebé tinan kotuk tuir formasaun iha Sentru Formasaun Jurídiku Judisiária ne’e konklui ona sira-nia teória no agora sira halo ona estajiu ba Tribunál sira”, nia dehan.
“Lei organiazaun judisiária ne’e la implementa ho didiak, impaktu ba setór justisa liuliu ba povu iha área remota sira tenke selu osan ba karreta hodi mai tuir julgamentu, la’o dook ne’e ladún efisiénte no efikasia”, nia adianta.
Nia mós husu Governu atu rezolve fazeadamente hodi kria kondisaun ba implementasaun lei organizasaun judisiária.
“Sé bele karik Governu rezolve fazeadamente hodi kria kondisaun ba implementasaun lei organizasaun judisiária. Sé ita la implementa lei organizasaun judisiária ne’e mak ita-nia setór justisa sei la efetivu ho másimu”, nia dehan.
Jornalista: Natalino Costa
Editór : Zezito Silva
