DILI, 05 janeiru 2024 (TATOLI)—Governu liuhosi Ministériu Transporte no Komunikasaun (MTK) daudaun ne’e hapara ona importasaun transporte públiku tum-tum.
“Tum-tum ne’ebé ita rejista hahú importa to’o agora hamutuk 1.345, ba janeiru to’o setembru 2023 ita rejista 817. Maibé hahú outubru sa’e mai to’o agora. Nune’e, Governu deside provizóriu la importa tan ona,” Diretora Nasionál Transporte Terrestre, Maria Antónia, informa ba Agência Tatoli, iha ninia knaar fatin, Diresaun Nasionál Transporte Terrestre (DNTT), Balide, sesta ne’e.
Objetivu Governu deside hapara importasaun-tum tanba uluk na’in ba transporte ne’e halo deklarasaun katak bainhira sira importa tum-tum sei halo operasaun iha munisípiu de’it maibé daudaun tama to’o munisípiu Dili.
“Governu deside hapara provizóriu importasaun tum-tum tanba haree ba nia velosidade no kapasidade halai ne’e laiha, sira so bele halai ho velosidade 20 de’it, ida-ne’e hamosu engarafamentu,” nia akresenta.
Notísia relevante : DRTT hapara ona rejista tum-tum foun tama iha Oé-Cusse
Nune’e, Governu ba oin sei haree no kria baze legál ruma ba importasaun tum-tum.
Diretora dehan, tum-tum loloos ne’e halo operasaun iha parte Liquiçá to’o rotunda Tibar no labele to’o Tasi-tolu, maibé daudaun ne’e motorista sira lori tama to’o Tasi-tolu.
“Ida-ne’e ladi’ak tanba hamosu engarafamentu ba movimentu rodaviáriu públiku,” nia hato’o.
Haree ba situasaun ne’e, DNTT iha ona planu, hahú tinan ne’e sei tau funsionáriu sira iha Tasi-tolu atu kontrola tum-tum, nune’e labele tama to’o Tais-tolu.
“Ha’u husu ba motorista tum-tum sira, liu-liu ba munisípiu Liquiçá nian, ba oin halai tum-tum tenke la’o tuir nia regra, bele perkore de’it hosi Liquiçá mai to’o de’it rotunda Tibar maibé labele tama to’o Tasi-tolu,” nia apela.
Transporte tum-tum daudaun ne’e halo operasaun iha Manatuto, Lautém no Liquiçá inklui Oé-cusse.
Governu anteriór antes ne’e hatún ona despaixu hodi na’in ba transporte ne’e bele selu taxa ba Governu, maibé ba oin sei revee filafali hafoin foti desizaun.
Jornalista : Arminda Fonseca
Editora : Julia Chatarina
