DILI, 16 janeiru 2024 (TATOLI)—Ministru Komérsiu no Indústria, Filipus Nino Pereira, informa, empreza importadora rua sei ezekuta programa Governu fó subsídiu ba foos iha tempu badak.
“Empreza rua ne’ebé asina ona akordu atu implementa polítika subsídiu faze daruak mak hanesan Kreativu Furak no Alfa Dili. Ohin dadersaan empreza implementadór sira asina ona akordu ho Ministériu Komérsiu no Indústria hodi implementa polítika foos subsídiu, ne’ebé tuir planu sei implementa iha fulan janeiru ne’e,” Ministru hateten iha Bebora, tersa ne’e.
Notísia relevante : Membru PN kontinua preokupa folin foos sa’e iha merkadu
Tuir akordu hosi Alfa Dili sei tau foos tonelada 7.500 (saku 300.000), ho marka Golden Star, fa’an kilógrama 25 ho folin $11,50 no kilógrama 20kg ho folin $9.
“Ohin sira asina ona nota entendimentu, sira sei rekolla dadus kliente sira hosi sira-nia rede distribuisaun iha munisípiu, hotu sei implementa tanba ita hakara foos ne’e to’o ba munisípiu no postu administrativu hotu hodi hakma’an ita-nia konsumidór sira ne’ebé afetadu ba folin foos sa’e,” nia akresenta.
Jornalista : Arminda Fonseca
Editora : Julia Chatarina
