BOBONARO, 22 janeiru 2024 (TATOLI) – Kodisaun estrada iha área Hol-lak, Ilibole, suku Oeleu, difikulta movimentasaun tranporte públiku no privada ho diresaun kapitál Maliana ba postu administrativu Bobonaro no Lolotoe.
Motorista Kamioneta, Domingos Filipe de Jesus, hateten kondisaun estrada refere grave akontese hafoin akontese udan boot durante ne’e.
Notisia relevante: Komunidade husu Governu tau-matan ba estrada Maliana-Bobonaro
“Ami horisehik loraik kedas sa’e mai atu lori sasán ba Bobonaro to’o iha leten oan ne’e karreta sa’e labele, patina mós la sa’e to’o kalan boot mós sa’e ladi’ak nafatin, ami horikalan toba iha-ne’e tanba udan tún mai tan, halo estrada ne’e tahu dodok, ita gás karreta kois de’it be sa’e ladi’ak, agora mak ami foin koko fali, tanba maran oituan ona,” nia informa ba Tatoli, iha terrenu, segunda ne’e.
Motorista ne’e husu ba Autoridade munisípiu Bobonaro, minitériu Kompetente atu tau-matan ba kondisaun estrada refere hodi fasilita komunidade sira-ne’ebé viajen ho motorizada no karreta.
“Estrada ida-ne’e iha tinan kotuk IGE mai halo reabilitasaun tiha, maibé udan mai lakleur de’it sobu, agora aat fali, ne’ebé sé bele governu buka maneira oinsá halo netik valeta ruma ba,” nia fó hanoin.
Komunidade Bobonaro, Felisberto Amarál, haktuir estrada refere sempre grave tanba kada tinan governu halo de’it reabilitasaun.
“Ami-nia estrada ida-ne’e, halo iha tempu Indonézia nian to’o agora, maibé realidade nia aat hotu ona mos governu seidauk halo foun, sira promote dehan atu halo foun, to’o agora iha ne’ebé, mai mak taka ho fatuk ho rai lakleur udan tún aat fali ona. Ida-ne’e ami hanesan povu sente triste,” nia kestiona.
Tuir observasaun Agência Tatoli iha terrenu nota katak, hahú dader tuku 07:00 to’o tuku 08:00 resin ne’e akontese engrafamentu iha xuvida ne’e, tanba tenke hein no ajuda malu hodi ultrapasa tiha mak foin ida tuir tán.
Enkuantu estrada ne’e mós liga ba postu administrativu Atsabe, munisípiu Ermera no postu administrativu Zumalai, munisípiu Covalima.
Notísia relevante: Estrada liga suku Oe-leu ba Lolotoe ameasa atu kotu
Jornalista: Sérgio da Cruz
Editór: Evaristo Soares Martins
