DILI, 25 janeiru 2024 (TATOLI) – Ministériu Komérsiu no Indústria (MCI) sei hadia mekanizmu distribuisaun foos subsídiu liuhosi atividade bazar barratu.
“Agora ita hakarak hadia mekanizmu distribuisaun ba foos subsídiu ida-ne’e, dahuluk mak hakarak faan direta liuhosi atividade bazar barratu no daruak mak ita tau marka subsídiu iha saku lolon atu ema labele manipula nia folin”, Ministru Komérsiu no Indústria Nino Perreira informa iha Ai-meti laran, ohin.
Governu orienta ona empreza importadór hanesan Kreative Furak atu tau marka foos subsídiu atu konsumidór sira hareee hodi hola no labele manipula folin.
“Ita orienta ona ba empreza importadór Kreativu Furak atu tau marka foos subsídiu iha saku lolon nune’e ita-nia konsumidór sira bele hola”, nia informa.
Nia afirma, Empreza Alfa Dili ho marka foun Golden Star, tanba sira-nia saku diferente ho saku sira seluk, entaun ida-ne’e sei fasilita di’ak liután konsumidór sira bele sosa foos subsídiu ida-ne’e.
“Foos ne’ebé mak marka subsídiu mantein ho presu ne’ebé mak kontrolu husi Governu, maibé ami mós rekoñese katak prátika iha terenu oin seluk hanesan balun sira inventa folin, entaun ida-ne’e hahalok ida ne’ebé mak la kontribui ba esforsu ne’ebé mak Governu halo hela hodi fasilita konsumidór sira ne’ebé mak kapasidade ka biit la to’o atu sosa, entaun ita nafatin fó hanoin malu atu foos subsídiu bele to’o iha ita-nia konsumidor sira ne’ebé mak presiza”, nia relata.
Nia subiña, Governu deside foos ho marka rua mak Golde Star ho Beruang Merah, tanba Governu asina MoU ho empreza hamutuk lima, maibé iha empreza tolu mak ezekuta hanesan Perisos, Alfa Dili no Kreativu Furak, agora faze dahuluk hahú husi fulan outubru to’o dezembru tinan kotuk ne’e la’o ona mak husi Empreza Perisos ho Kreativu Furak, agora ba oin mak Alfa Dili no Kreativu Furak.
Iha sorin seluk, Asistente Jerente, Yati Zaka, hateten Empreza Loja Kreativu Furak, daudaun ne’e, seidauk bele implementa foos subsídiu ba faze daruak nian tanba sei hein karimbu atu taka ba foos.
Nia dehan, loos, sira-nia parte asina ona nota entendimentu ho Governu, atu impelmenta foos subsídiu maibé daudaun seidauk bele implementa tanba hein karimbu.
“Ami seidauk implementa tanba ko’alia ona ho Governu katak ami-nia foos sei tau karimbu hakerek subsídiu ho objetivu oinsá ema labele halo manipula ba folin foos iha área remota sira, tanba antes ne’e retallista sira balun mai sosa ba faan fali iha área remota ho folin la tuir Governu tau ne’e”, Yati Zaka, informa.
Nia dehan, bainhira empreza tau ona karimbu mak retallista sira faan folin la tuir regra, komunidade iha direitu atu bele hato’o keixa ba Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,I.P) no Ministériu Komérsiu Indústria (MKI).
“Tuir akordu ne’ebé ita halo ho Governu mak atu implementa foos subsídiu ho durasaun fulan tolu no daudaun ne’e karimbu iha dalan ona no ita sei implementa iha fulan ne’e nia-laran”, nia konklui.
Notísia relevante : Governu buka medida kontrola intermediária manipula folin foos
Jornalista : Felicidade Ximenes
Editór : Zezito Silva
