DILI, 01 fevereiru 2024 (TATOLI)—Parlamentu Nasionál (PN) liuhosi komisaun D trata asuntu Ekonomia no Dezenvolvimentu, propoin halo revizaun ba lei atuál ba Lei Investimentu ho Lei Sosiedade Komersiál.
Notísia rRelevante: Lei Sosiedade Komersiál Atu Regula Setór Privadu
Prezidente Komisaun D, Deputadu Ricardo Baptista, hateten ohin komisaun hala’o audiénsia públika ho Ministru Komérsiu no Indústria (MKI), Filipus Nino Pereira, parte komisaun D liuhusi Deputadu sira hato’o presiza halo revizaun ba lei rua refere.
“Ohin, Parlamentu liuhosi maluk Deputadu sira (Deputadu membru komisaun D) hotu husu atu haree ida-ne’e, tanba depois iha implementasaun lei ne’e la han malu presiza halo armonizasaun ba lei rua ne’e,” Prezidente Komisaun D ne’e hateten ba Agência Tatoli hafoin ramata audiénsi ho Ministru Komérsiu no Indústria (MKI), Filipus Nino Pereira, iha uma fukun PN, kinta ne’e.
Nia hateten, hanoin atu altera iha lei atuál iha artigu barak mak presiza haree hanesan iha lei Sosiedade Komersiál karik iha buat balun ladún han malu ho lei Investimentu ne’ebé iha presiza duni haree iha artigu sira.
Ezemplu, iha lei Investimentu hateten katak osan hira mak ema investór sira atu mai tau no lei Sosiedade Komersiál ko’alia oinsá mak atu proteje investór lokál sira, no mós oinsá proteje investór mai hosi rai-li’ur, tenke armoniza lejislasaun sira-ne’e atu labele difikulta ema mai investe iha Timor-Leste.
“Investór timoroan sira mós sente iha oportunidade ba sira, keta halo fatin balun ne’ebé loloos timoroan de’it mak bele halo, ita fó oportunidade ba parte investór hosi li’ur. Sra loke kioske oan ida mós timoroan bele halo, la presiza ema hosi rai-li’ur mai loke kioske. Ne’e hanesan ezemplu ida,” nia hateten.
Ho revizaun ne’e atu regula investidór estranjeiru atu mai investe iha rai-laran tenke mai ho kapitál boot no la’ós atu mai fali loke kioske ka warung sira-ne’ebé hanesan ho timoroan mós bele halo, Prezidente Komisaun D hatán, atu regula ne’e tenke revizaun ba lei mak regula, nune’e presiza armoniza lei Investimentu ho lei Sosiedade Komersiál.
Maibé, tuir nia, keta haluha Timor-Leste mós tama hela ba merkadu livre no hein adezaun ba Organizasaun Mundiál Komérsiu (OMK) no ASEAN, nune’e lejislasaun barak mak presiza haree inklui investimentu no komérsiu.
Ministru Komérsiu no Indústria (MKI), Filipus Nino Pereira, hateten iha audiénsia ne’e simu mós informasaun hosi Deputadu sira atu halo revizaun ba lei Investimentu ho lei Sosiedade Komersiál ne’ebé presiza armoniza, no presiza envolvimentu setór privadu sira
Nune’e, nia hateten, ba oin órgaun lejislativa ne’e sei aprezenta inisiativa revizaun ne’e hodi diskute kle’an liután no hetan aprovasaun hosi órgaun lejislativa.
Notísia Relevante: Presiza Regula Ema Estranjeiru Hala’o Atividade Negósiu
Jornalista : Nelson de Sousa
Editór : Cancio Ximenes
