BOBONARO, 15 fevereiru 2024 (TATOLI) – Diresaun Servisu Munisipál Obra Públika (DSMOP), Autoridade munisípiu Bobonaro, iha tempu badak sei hatutan pedidu hosi autoridade lokál sira ba Ministériu Obra Públika (MOP) atu rezolve lalais ponte iha àrea Samutaben, suku Manapa, ligasaun hosi postu aministrativu Cailaco ba postu administrativu Maliana, munisípiu Bobonaro, ne’ebé daudaun ne’e ameasadu atu kotu hafoin akontese udan-boot durante ne’e.
Diretór Servisu Munisipál Obras Públika,Munisípiu Bobonaro, Marcelino Gonçalves Godinho, informa daudaun ne’e pedidu iha ona Prezidente Autoridade Munisípiu Bobonaro.
Notísia Relevante:Ponte ligasaun Cailaco-Maliana ameasadu kotu
“Ita esforsu nafatin ba ida-ne’e, mesmu ke la’ós ita-nia kompeténsia, maibé ida-ne’e ita-nia polulasaun sira enfrenta difikuldade kona-bá ponte. Daudaun ne’e administradór postu halo ona karta mai autoridade, karta hirak-ne’e ami sei enkamiña ba Ministériu Obra Públika, atu nune’e hatún despaxu ba IGEADI hodi sira bele halo intervensaun iha tempu badak,” nia informa ba jornalista sira iha edifísiu administrasaun munisipál Bobonaro, kinta ne’e.
Administradór postu administrativu Cailaco, Rodolfo da Cruz, husu Ministériu Obra Públika orienta lalais IGEADI atu halo Intervenasaun lalais, tanba kondisaun atuál ponte ne’e hela de’it metru ida atu kotu totál.
Enkuantu antes ne’e ponte refere kotu totál iha fulan-dezembru tinan 2023 no IGEADI konsege halo ona normalizasaun, maibé liu de’it fulan ida kontinua hetan estragu hosi volume bee-mota.
Autoridade postu ne’e dehan, iha tempu badak sei komunika ho líder komunitária no Polísia Nasionál Timor-Leste (PNTL) eskuadra Cailaco atu taka provizóriu dalan iha ponte refere hodi evita akontese asidente tráfegu.
Nia sujere ba Ministériu Obra Públika ba futuru atu halo reabilitasaun no konstrusaun foun hodi fasilita movimentasaun públiku.
Notísia relevante: Ponte ligasaun Cailaco-Maliana ameasadu kotu
Jornalista: Sérgio da Cruz
Editór: Evaristo Soares Martins
