iklan

EKONOMIA, HEADLINE

Kuda kaju bele fó lukru di’ak ba agrikultór sira

Kuda kaju bele fó lukru di’ak ba agrikultór sira

Kaju. Imajen/Google.

DILI, 15 fevereiru 2024 (TATOLI) – Diretór Nasionál Kafé no Planta Industriál, Julião dos Santos, dehan Timor-Leste iha poténsia ba kuda ai-fuan kaju tanba bele fó lukru di’ak ba família agrikultór sira.

Tanba ne’e, Ministériu Agrikultura sei apoiu osan rihun $2 to’o $5 ba agrikultór sira atubele halo manutensaun ba plantasaun ne’e hodi fó rezultadu di’ak bainhira iha tempu kolleta.

“Ita daudaun ne’e iha planta kaju ne’ebé boot tebes ne’ebé maka ita-nian komunidade sira kuda iha rai poténsia sira, maibé sira ladún komprende no la tau importánsia atu halo manutensaun ba kaju sira ne’e, entaun ninia produsaun ne’e la barak no la fó fuan di’ak”, Julião dos Santos dehan iha Caicoli, ohin.

Diresaun Nasionál Kafé no Planta Industriá sei disponibilza, iha tinan ida ne’e s, kaju oan ba komunidade atu kuda tan iha rai ektare 10 ne’ebé identifikadu ona iha Suai Loro, Kribas, Liquiçá, Atabae no Natarbora, nune’e sira bele halo manutensaun hodi hetan produsaun ne’ebé di’ak iha futuru. Funsaun husi kaju ne’e nia fuan bee halo ba sumu no ninia musan bele prodús fali ba hahán merenda nian.

Antes ministériu atu fó apoiu fundu ba agrikultór sira, diresaun sei realiza uluk formasaun adekuada ba komunidade sira ne’ebé kuda kaju ne’e atu sira bele hetan koñesimentu di’ak hodi bele tau-matan ba plantasaun ne’ebé sira kuda ona. “Pelu menus sira bele hatene uluk vantazen husi kaju ne’e rasik depois maka sira bele tau atensaun ba ai-horis ne’e”.

Dirijente ne’e esplika katak plantasaun kaju ne’e kle’ur liu tinan rua bele kolleta ona nia rezultadu. Kuandu nia produsaun di’ak, kada kilo bele hetan $1 ba leten.

Nia lembra katak iha 2018, ema husi Austrália no Indonézia mai sosa ona kaju nia musan no kada kilo sira sisa ho folin entre sentavu 0,70 to’o $1.00. “Ne’e tanba rai ektare kuaze 168 ho poténsia boot iha Suai Loro, Kribas, Natarbora, Liquiçá, Atabae, inklui Ainara ne’ebé kuda ona kaju ne’e ladún hetan atensaun no manutensaun di’ak. Tanba ne’e maka ninia produsaun mós la di’ak hodi afeta ba ninia folin”, esplika.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!