DILI, 15 fevereiru 2025 (TATOLI)—Sekretáriu Estadu Asuntu Toponímia Organizasaun Urbana (SEATOU), Germano Santa Brites, hateten iha tempu badak nia parte hamutuk ho ekipa sei halo observasaun bá fatin protejida lagoa Tasi-tolu.
“Iha tempu badak ha’u sei bá haree fatin protejida iha área lagoa Tasi-tolu ne’ebé daudaun ne’e komunidade kontinua livremente halo uma hodi okupa,” Sekretáriu Estadu informa ba Agência Tatoli, iha Ministériu Finansa, Aitarak-Laran, kinta ne’e.
Maski fatin ne’e nu’udar zona protejida maibé daudaun ne’e komunidade kontinua okupa lhodi halo uma nakonu no rabat iha lagoa ninin.
“Daudaun ita sei haree uluk fatin sira iha estrada ibun ne’ebé Governu fó ona atensaun maibé seidauk sai hotu mak bá lagoa Tasi-tolu nian,” nia akresenta.
Notísia relevante : Cobra husu Governu konserva no halo lutu hale’u lagoa Tasi-Tolu
Antes ne’e, Antigu Juventude Rezisténsia, Aleixo Cobra, husu IX Governu Konstitusionál atu prezerva fatin istóriku hanesan Tasi-tolu tanba fatin ne’e istórika ba luta libertasaun nasionál no fatin Papa João Paulo II halo misa bainhira halo vizita mai Timor-Leste iha loron 12 outubru 1989.
Aleixo Cobra sujere ba Governu atu kria regra no halo moru haleu área Tasi-tolu, atu nune’e populasaun labele aproveita halo uma no labele fa’an sasán iha laran ne’ebé hatudu imajen ladún di’ak tanba Tasi-tolu ne’e hanesan odamatan boot ba ema estranjeiru sira.
Governu nia polítika ida mak serbisu hamutuk ho igreja atu konserva Tasi-tolu inklui fatin istóriku seluk.
Nune mós, Administradór postu administrativu Dom Aleixo, munisípiu Dili, José de Jesus, husu ba abitante ne’ebé okupa área protejida Tasi-tolu atu iha konxiénsia no koordena ho autoridade komunitária hodi husik fatin ne’e mamuk tanba Governu iha polítika no planu konstrui Otél estrela lima
Jornalista : Arminda Fonseca
Editora : Julia Chatarina
