DILI, 20 fevereiru 2024 (TATOLI)— Prezidente Partidu Demokrátiku (PD) atuál Vise-Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun, Mariano Assanami Sabino, hateten Prezidente Repúblika (PR), José Ramos Horta mak uza nia podér konstituisaun hodi ezonera António da Conceição hosi kargu Embaixadór Extraordináriu no Plenipotensiáriu Repúblika Demokrátiku Timor-Leste bá Repúblika Indonézia.
“Portantu, ne’e Prezidente nia podér, ha’u la interven ba iha ne’ebá. Ohin, ha’u mai iha Parlamentu Nasional hanesan Vise Primeiru Ministru no Ministru Dezenvolvimentu Rurál no Abitasaun. Buat hotu-hotu iha idak-idak nia podér konstituisaun fó dalan no fatin inklui fó podér ba instituisaun idak-idak atubele asume ninia responsabilidade,” Prezidente PD atuál Vise Primeiru, hatete ba jornalista sira hafoin halo audénsia ho Komisaun D ne’ebé trata asuntu Ekonomia no Dezenvolvimentu iha Parlamentu Nasionál (PN), kuarta ne’e.
Notísia relevante:PR Horta fó pose Embaixadór foun na’in-neen
PR Ezonera Kalohan
Prezidente Repúblika, Jose Ramos Horta, liuhosi dekretu Prezidente Repúblika ho númeru 14/2024, 13 fevereiru, ezonera António da Conceição hosi kargu Embaixadór Extraordináriu no Plenipotensiáriu Repúblika Demokrátiku Timor-Leste bá Repúblika Indonézia.
Tuir nota ne’ebé Agência TATOLI, asesu iha Jornál Repúblika, katak Xefe Estadu ezonera ho baze Konstituisaun Repúblika Demokrátika Timor-Leste iha artigu 87.º aliña b).
“Dekreta ezonera ona António da Conceição husi nia kargu Embaixador Extraordinário no Plenipotensiáriu Repúblika Demokrátika Timor-Leste ba Indonézia”. refere nota ne’e.
Tuir konstituisaun Repúblika artigu 87.º ko’alia kona-ba kompeténsia relasaun internasionál fó kompetensia ba Prezidente-Repúblika de’it mak iha domíniu kona-ba relasaun internasionál sira:
a) Deklara funu, wainhira iha ka atu iha agresaun, halo dame, tuir proposta Governu nian, rona tiha Konsellu Superiór Defeza no Seguransa nian, no bainhira Parlamentu Nasionál eh ninia Komisaun Permanente fó autorizasaun;
b) Foti no hasai embaixadór, reprezentante permanente no enviadu extraordináriu sira, tuir proposta Governu nian;
c) Simu karta kredensiál no simu akreditasaun hosi reprezentante diplomátiku raiseluk sira-nian;
d) Hamutuk ho Governu, sei hala’o prosesu kontratu hotu-hotu atu hetan akordu internasionál iha área defeza no seguransa nian;
Entretantu, iha loron 12 dezembru 2023, Prezidente Repúblika ofisializa António da Conceição nu’udar Embaixadór Timor-Leste ba Repúblika Indonézia hodi subtitui Filomeno Aleixo da Cruz liuhosi serimónia pose ne’ebé realiza iha Palásiu Prezidensiál, Bairru-Pité.
Embaixadór ne’e formalmente aprezenta ona mós karta kredensiál bainhira hahú simu mandatu iha nasaun ne’ebé deside ona.
Tribunál aplika pena efetivu tinan lima
Tribunál Judisiál Primeira Instánsia Dili, segunda (8/1), liuhosi akordaun Juiz ne’ebé kaer Prosesu Ivan Suritai deside pena efetivu tinan lima ba arguidu antigu Ministru Komérsiu Indústria (MCI), António da Conceicao, ba krime partisipasaun ekonómia no negósiu ne’ebé previstu iha artigu 279 númeru 2 hosi Kódigu Penál Timor-Leste, tanba iha julgamentu hatudu faktu sira provadu katak arguidu komete krime ne’ebé Ministériu Públiku imputa ba arguidu iha nia akuzasaun.
Rekorda katak Arguidu António Conceição asume kargu MCI, hahú iha 2012-2015
Iha 30 jullu 2015, António Conçeião uza nia poder hanesan ministru indika uluk Empreza Hugo Amor Unipessoal Lda atu implementa projetu eskavasaun ba fatin masin Atabae Postu Administrativu Atabae Munisípiu Bobonaro.
Advogadu Privadu Pedro Camões, mós submete ona rekursu ba Tribunál Rekursu hodi halo fali fiskalizasaun ba desizaun Tribunál Primeira instánsia Dili.
Notísia relevante:Tribunál aplika pena efetivu tinan lima ba António da Conceição
Jornalista: Nelson Sousa/Hortencio Sanchez
Editór : Florencio Miranda Ximenes
