DILI, 22 fevereiru 2024 (TATOLI)—Ekipa servisu tékniku, kinta ne’e, kontinua tun bá terrenu hodi sobu komunidade nia uma ne’ebé iha valeta leten, iha área Bidau Toko Baru Hospital Nacional Guido Valadares (HNGV).
Sekretáriu Estadu Asuntu Toponímia no Urbanizasaun, Germano Santa Brites Dias, hateten, atividade ne’e bazeia ba sirkulár ne’ebé foin lalais hasai ona iha loron 19 fevereiru.
“Atividade ne’ebé ohin ita halo maka kontinuasaun inundasaun ne’ebé foin lalais akontese iha semana kotuk, ita hasai uluk ona tahu no fase moos ona, fó hatene ba komunidade Bidau Toko Baru tomak atu koopera ho programa Governu ne’ebé la’o, nune’e ohin ita mai sobu fali uma ne’ebé harii iha valeta leten, hasai besi no karreta a’at sira ne’ebé iha estrada ninin tanba informasaun fó antes ona,” Sekretáriu Estadu dehan iha Bidau Toko Baru.
Notísia relevante : SEATOU sobu barraka negosiante iha Ai-mutin no muda bá Merkadu Manleuana
Nia garante, bainhira fatin moos ona bele halo espasu luan hodi bee dalan moos, nune’e udan tun bee sei halai tuir nia dalan.
“Hakarak ka lakohi simu ka la simu, ekipa konjunta hosi SEATOU, Jestaun Merkadu Munisípiu Dili, Terra no Propriedade inklui akompaña hosi Polísia Nasionál Timor-Leste (PNTL) kontinua hala’o serbisu Governu nian, tanba atividade ne’ebé la’o Governu la hanoin a’at ba nia povu maibé eduka oinsá hadomi ambiente hodi Dili sai organizadu no evita hosi inundasaun,” nia akresenta.
Governante ne’e konsidera, tempu ona atu halo mudansa ba sidade Dili, tanba ema okupa hotu bee dalan atu fa’an roupa segunda mão (obralan) no soe roupa a’at sira ba valeta kuak.
“Udan mai hamosu inundasaun mak ezije dehan Governu la tau matan. Ho ida-ne’e, agora Governu hala’o ona nia serbisu hodi haree ba fatin sira ne’ebé la seguru tenke sobu, komunidade ne’ebé okupa trotoár no valeta, laiha razaun ekipa kontinua sobu,” Sekretáriu tenik.
Abitante laiha hela fatin
Iha fatin hanesan, Abitante, Alda Maria Freitas, ne’ebé nia uma hetan sobu tanba harii iha valeta leten, hateten, nia parte nu’udar sidadaun koopera atividade ne’ebé SEATOU halo maibé sente triste.
“Ha’u sente triste tanba fatin laiha atu hela, daudaun sasán uma sobu sai, ne’ebé ha’u rai hela iha primu sira-nia uma, maibé ba oin atu bá hela iha ne’ebé la hatene, ha’u faluk ho oan na’in-rua,” nia tenik.
Alda Maria haktuir, uma ne’ebé nia hela uza materiál ne’ebé antes ne’e hetan apoia hosi Governu, iha momentu akontese inundasaun iha loron 04 abríl 2021 mak harii uma hodi fa’an obralan hodi sustenta moris.
“Antes mai sobu laiha informasaun ka karta ida ba ha’u, derrepente de’it mai sobu,” abitante lamenta.
Administradór postu administrativu Cristo Rei, Venâncio Tavares, haktuir, antes ne’e nia parte hamutuk ho líder komunitáriu sira fó sai ona avizu ba komunidade, desde iha tinan kotuk to’o mai tinan ida-ne’e.
“Ami sempre ho toa tama sai bairru fó avizu ba komunidade atu evita halo uma iha trotoar leten. Ha’u hanoin kona-ba informasaun SEATOU sei halo atividade sobu sai komunidade ne’ebé okupa espasu públiku no valeta sira, ha’u-nia líder komunitáriu fó ona avizu antes maibé komunidade barak nune’e dala-ruma balun rona no balun la rona, maibé ita fó avizu ona antes,” nia salienta.
Jornalista : Arminda Fonseca
Editora : Julia Chatarina
