iklan

HEADLINE, KAPITÁL

SEATOU sei fó sansaun administrativu ba loja fa’an materiál konstrusaun la seguru

SEATOU sei fó sansaun administrativu ba loja fa’an materiál konstrusaun la seguru

Sekretáriu Estadu Toponímia no Organizasaun Urbana, Germano Santa Brites Dias. Imajen/Tatoli

DILI, 22 fevereiru 2024 (TATOLI)Sekretaria Estadu Asuntu Toponímia Organizasaun Urbana (SEATOU) husu ba loja sira ne’ebé fa’an materiál konstrusaun tenke haree ba kestaun seguru.

“Ha’u haruka ona hau-nia diretór sira hasai sirkulár ida ba loja boot sira, liu-liu ba sira ne’ebé fa’an materiál konstrusaun inklui fa’an semente iha loja laran la kuidadu nia u’ut sai to’o ba estrada bele afeta ba komunidade nia saúde, bainhira ita ko’alia la rona ita husu Polísia Nasional Timor-Leste (PNTL) kesi tiha loja, kumpre tiha mak loke, no sira ne’ebé la kumpre sei fó sansaun administrativa,” Sekretáriu Estadu Asuntu Toponímia Organizasaun Urbana, Germano Santa Brites Dias, hateten, iha Bidau Toko Baru, hafoin hamutuk ho ekipa servisu tékniku sobu komunidade nia uma ne’ebé halo iha valeta leten, kinta ne’e.

Sirkulár ne’e atu fó hatene ba na’in no jerente ba loja sira, katak bainhira fa’an tenke iha fatin di’ak no seguru atu semente u’ut labele halo poluisaun ambiente hodi afeta fali ba ema-nia saúde tanba daudaun públiku barak preokupa ho kondisaun ne’e.

Notísia relevante : Ekipa servisu tékniku kontinua sobu uma okupa valeta iha Bidau

Sansaun administrativa ne’e vale mós ba karreta ne’ebé tula sai semente bá estrada boot no la uza lona taka, nune’e anin huu semente rahun ba estrada. Bainhira ekipa hetan sei fó sansaun ba kondutór inklui empreza na’in tanba kondisaun ne’e bele fó ameasa ba ema-nia saúde.

“Ita mós sei fó sansaun ba kontentór ne’ebé tama sai lori tahu mai estrada boot tanba ita fó avizu antes ona, hahú hosi setembru 2023 to’o mai agora,” nia akresenta.

Aleinde ne’e, ekipa servisu tékniku sei kontinua hala’o serbisu hasai komunidade no loja sira-nia instalasaun ruma ne’ebé okupa kalsada (trotoár) no interrompe movimentu espasu públiku inklui sei foti sai hotu motór, karreta no besi a’at sira ne’ebé komunidade tau iha estrada ibun.

“Karreta na’in sira hakarak hadi’a tenke muda, se lae ita sei foti hotu inklui karreta a’at sira ne’ebé taka dalan okupa fatin iha bairru laran mós ita sei foti, agora hein kestaun tempu de’it, ne’ebé husu ita hotu kolabora malu,” Sekretáriu Estadu fó hanoin.

Iha tempu badak mós ekipa sei kontinua atua fatin fa’an roupa segunda mão (obralan) iha área Tasi-tolu, Praia dos Coqueiros, Institute of Bussiness (DIT) tanba notifikasaun fó sai ona.

Iha loron 12 fevereiru, Ministériu Administrasaun Estatál (MAE) hamutuk ho SEATOU hasai sirkulár ho númeru referénsia SEATOU-MAE/II/2024, ne’ebé hanesan programa IX Governu Konstitusional kona-ba Desentralizasaun, artigu 7 dekretu-lei númeru 49/2023, 23 agostu Orgánika MAE, dekretu-lei númeru 3/2024 17 janeiru, nomós alterasaun dahuluk dekretu-lei númeru 33/2008 27 agostu, kona-ba orden servisu hosi MAE liuhosi karta númeru 61/M- MAE/IX/2023 kona-ba kompétensia SEATOU

Bazeia ba dekretu-lei númeru 3/2024 17 janeiru, nomós alterasaun dahuluk ba dekretu-lei númeru 33/2008 27 agostu, hosi artigu 1 ko’alia kona-ba natureza, artigu 3 kona-ba infrasaun kontra ordenasaun sira ne’ebé sei hetan sansaun ka multa, artigu 5, alinea a, h ne’ebé ko’alia kona-ba proibisaun sira.

Artigu 6, pontu 1,2,3 no artigu 5 kona-ba organizasaun ijiene orden públika, artigu 9nko’alia kona-ba prosedimentu kontra ordenasaun, artigu 12 fó kompeténsia ba Prezidente Autoridade Munisipál sira atu kontrola bazeia ba anexu I kona-ba valór koima kontra ordenasaun tuir artigu 5.°, númeru 1, alínea a) h) hosi $5 to’o $500 no $10 to’o $1.000, artigu 6. númeru 1, 2 alinea a) g) a) a h nomós artigu 8.

Liuhosi karta sirkulár ne’e fó sai bandu sira hanesan labele husik animál la’o livre iha estrada públika tanba bainhira animál ruma pertuba asidente ruma, maka animál na’in sei hola responsabilidade, labele fa’an sasán taka dalan públiku ka kalsada, labele taka dalan ka valeta no ikus maka labele halo konstrusaun iha área protejida no konstrusaun ilegál sira.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!