LAOS, 01 marsu 2024 (TATOLI) – Prezidente Repúblika, José Ramos Horta, propoin atu halo promosaun atividade interkámbiu entre Joven ka Estudante Timor-Leste (TL) no Repúblika Laos, nasaun membru definitivu ida husi organizasaun Sudeste-Áziatiku (ASEAN, sigla inglés).
“Ha’u hakarak joven bele mai vizita iha ne’e no mós konvida sira ba vizita Timór nune’e mós Governu rai rua bele promove interkámbiu ba grupu estudante husi ne’e ba Timor-Leste no Timor-Leste bele mai iha ne’e (Laos),” Xefe Estadu hateten, durante vizita Estadu no sai oradór prinsipál hodi hato’o palestra ba estudante sira iha Universidade nasionál Laos, ohin.
Prezidente Repúblika afirma, ho interkámbiu entre estudante sira bele hametin liu amizade entre povu.
Nia afirma tan, “Interkámbiu entre joven sira ne’e mak ita bolu people to peole diplomacy ne’e, mak ita bolu amizade, amizade la’ós lider boot sira hakuak malu maibé mós sosiedade tenke koñese malu, konese malu liuhusi kultura, múzika, Literatura, turizmu no mós liuhusi vizita malu”.
Iha vizita no palestra ne’e, Xefe Estadu TL, José Ramos Horta, hateten, povu nasaun Laos moris amizade tebtebes no zero violénsia tanba ne’e liuhusi palestra ida ne’e Xefe Estadu hato’o mós kona-ba situasaun Timor-Leste no ba futuru oinsá konvida joven nasaun Laos vizita Timor-Leste, nune’e mós interkámbiu estudante ka joven sira entre país rua nian.
“Laos nasaun ida ne’ebé seguru liu hanesan Abu-dhabi, Dubai, Japaun. Povu ne’e kalma no sivilizadu los, sira-nia dezenvolvimentu, istorikamente, tuir evolusaun edukasaun nian, tanba ne’e iha palestra ne’e mós ko’alia ba sira kona-ba situasaun Timór nian,” Horta haktuir.
Entretantu, alende vizita Universidade Laos no hato’o palestra, Prezidente Repúblika, José Ramos Horta, vizita mós kompana saysettha development Zone hanesan zona ida ne’ebé kooperasaun entre Xina no Laos iha área indústria, komérsiu no sira seluk.
Jornalista: Joanico de Araújo
Editór: Rafael Ximenes de A. Belo
