Governu presiza valoriza militár sira-ne’ebé hadau kilat iha 20 agostu 1975
OÉ-CUSSE, 03 marsu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, husu ba Governu liuhosi Primeiru Ministru, Xanana Gusmão, atu fó rekoñesimentu Estadu bá militár sira-ne’ebé mumentu hada’u kilat hosi kolonilizmu portugés iha loron 20 agostu 1975.
Rogério Tiago Lobato, hato’o nia apelu ne’e iha diskursu selebrasaun loron veteranu nian ba dala-hitu iha kampu Oébau, Oé-Cusse, domingu ne’e.
“Molok atu hakotu ha’u-nia diskursu, ha’u hakarak lansa apelu ida ba ita-nia maun boot Xanana Gusmão, ne’ebé agora sai hanesan Primeiru Ministru RDTL, ita-nia líder, ne’ebé nia mak patrimóniu vivu da luta libertasaun nasionál,” Rogério Tiago Lobato hateten.
“Favór ida maun boot, labele haluha militár sira Timor-oan sira-ne’ebé iha 20 agostu 1975, sira sai hosi ezersitu portugés, sira hada’u kilat rihun ba rihun iha Dili, iha foho, iha Bobanro, Maubisse no Aileu, hodi harii FALINTIL, pelumenus fó netik rekoñesimentu Estadu Timorense ba sira, tanba sira mak la halo asaun iha momentu ne’ebá, susar ba FALINTIL atu moris, sekarik FALINTIL la moris, susar mai ita atu hetan ukun rasik-an,” nia afirma.
Notísia relevante: CMCLN Oé-Cusse ajenda atividade haat komemora loron veteranu
Eis Ministru Interiór ne’e, fundamenta kona-bá loron veteranu, nia husu veteranu sira-ne’ebé sei moris no sira-ne’ebé sei mate, ho sira-nia sakrifísiu, maka Timor-Leste bele hetan nia liberdade, libertasaun no independénsia.
“Veteranu sira-ne’e hotu, servisu ho laran tomak, tan ne’e maka ohin ita foti aas ita-nia bandeira, bele kanta ho orgullu ita-nia ino nasionál pátria pátria,” nia afirma.
Lobato hatutan, veteranu sira-ne’ebé sei moris, labele haluha sira-ne’ebé mate ona, tenke kontinua halo esforsa, atu serbí rai ida-ne’e, atu konstrui prezente ida-ne’ebé ho haksolok, feliz no prepara futuru ida di’akliu, banita-nia oan sira, tanba sira mak sei kontinua ita-nia mehi.
“Veteranu Oé-Cusse, trava imi-nia kombate ne’e oin seluk, dalaruma imi forma singulár, ne’e katak imi de’it iha Oé-Cusse ne’e mak halo kombate ida hanesan ne’e, imi partisipa iha atividade rede klandestina, imi veteranu rede klandestina, ita labele haluha katak, tanba imi mobiliza ema barak ba independénsia, ita-nia herois ita-nia veteranu barak mate, ita hakruuk no respeita, tanba imi servisu di’ak tebes, faktu hatudu bainhira halo referendu 1999 povu Atoni Oé-Cusse vota ba independénsia kuaze 100%, ne’e duni parabéns ba imi povu Oé-Cusse.”
Notísia relevante: “Tara” triste Xanana Gusmão la partisipa iha komemorasaun loron nasionál veteranu
Prezidente Konsellu Veteranu Oé-Cusse, Vênancio Lafo, hateten, tema importante iha selebrasaun loron istóriku ne’e, maka reflesaun atu hamutuk hakat ba futuru, haree ba kotuk iha tinan-hitu ezisténsia Konsellu Veteranu no tinan-44, hodi hanoin ba futuru saida mak atu halo.
Nia konsidera, tema ne’e nu’udar esperansa ida, atu fanu timoroan hotu, liuliu jerasaun foun sira, ho obetivu ida katak, atu eduka no fanun espíritu nasionalizmu hodi hatene pasadu no projeta ba futuru hodi kontribui ba pás no estabilidade.
“Ita labele haluha, loron istóriku ne’e, hanesan pasadu ida tanba ne’e sei motiva ita hateke ba futuru,” nia fó hanoin.
Venâncio Lafo, relembra, iha loron 03 marsu iha tinan 1981, sai fatór importante ba mudansa polítika, liuliu hamosu konseitu unidade nasionál, hodi muda estratéjia funu, nune’e liuhosi Konsellu Munisipál Kombatente Libertasaun Nasionál bele sai mákina mudánsa ba nasaun.
Notísia relevante:Governu fasilita ona subsídiu oinoin ba veteranu sira
Entretantu tuir livru 3-C, Orsamentu Jerál Estadu (OJE) 2023 RAEOA-ZEESM Timor-Leste nian, haktuir benefisiáriu ne’ebé hetan apoiu osan Estadu iha RAEOA ba kombatente ou veteranu libertasaun nasionál hamutuk ema na’in-363, no mártir libertasaun nasionál hamutuk ema na’in-223.
Jornalista: Abílio Elo Nini
Editór: Evaristo Soares Martins
