DILI, 04 marsu 2024 (TATOLI)- Defeza Eis-ministru Costâncio Pinto Advogadu Privadu, Timotio de Deus, hateten, nia parte hahú prepara ona rekursu hodi kontesta desizaun Tribunál Judisiál Primeira Instánsia Dili ne’ebé aplika pena prizaun efetivu tinan neen ba nia kliente.
“Sim, ha’u simu ona akordaun hosi Tribunál Rekursu ba desizaun kazu ha’u-nia kliente Costâncio Pinto nian. Ha’u agora haree hela rekursu. Kuandu ha’u finaliza ona ha’u sei hatama rekursu ba Tribunál Judisiál Primeira Instánsia,” Timotio de Deus hateten ba TATOLI via telefónika,sSegunda, ohin.
Defeza Eis-ministru Costâncio Pinto Advogadu Privadu dehan, kuandu defeza hatama rekursu ne’e normalmente atu kontesta ba desizaun ruma hosi Tribunál ne’ebé hosi defeza haree nesesáriu. Tanba ne’e mak defeza halo rekursu hodi halo kontestasaun.
Entretantu, Tribunál Judisiál Primeira Instánsia Dili (TJPID), kondena eis-ministru Komersiu Indústria Ambiente (MCIA) Constâncio ba krimi partisipasaun ekonómika iha negósiu tanba durante iha julgamentu faktus provadu katak eis-ministru MCIA Constâncio Pinto envolve duni krimi partisipasaun ekonómika no negósiu ne’ebé Ministériu Públiku imputa ba nia tanba uza kompeténsia hanesan Ministru aprova osan subvensaun ba empreza Stard Product Unipesoál Lda ba projetu zero plástiku maibé lakontrola to’o projetu ne’e lala’o to’o ikus fó prejuízu ba Estadu.
Nune’e Tribunál aplika pena efetivu ho prizaun tinan neen ba eis-ministru Constâncio Pinto, no Tribunál mós aplika pena efetivu prizaun tinan lima ba antigu Diretór Jerál MCIA arguidu António da Costa ba krimi partisipasaun ekonómia iha negósiu enkuantu arguidu José Deolindo Ximenes nu’udar nain ba empreza Stard Product Unipesoál Lda, Tribunál pena prizaun tinan haat no haruka hodi devolve fila fali osan Estadu ho montante $24.000 ne’ebé empreza uza ona.
Notísia relevante:Tribunál aplika pena prizaun efetiva tinan-neen ba antigu Ministru Constancio Pinto
Jornalista: Natalino Costa
Editór: Rafael Ximenes de A. Belo
